എന്നും ഒരേ ചിക്കൻ കറി കഴിച്ച് മടുത്തോ?. എളുപ്പത്തിൽ ഒരു നാടൻ ചിക്കൻ പെരട്ട് റെസിപ്പി നോക്കിയാലോ? അര മണിക്കൂറിൽ തയ്യാറാക്കാവുന്ന റെസിപ്പിയാണ് ഇത്. സാധാരണ ചിക്കൻ കറി ഉണ്ടാക്കുന്ന അതേ സാധനങ്ങൾ ഉപയോഗിച്ച് ഈ റെസിപ്പി തയ്യാറാക്കാം.
ആവശ്യമുളള സാധനങ്ങൾ
ചിക്കൻ - 1 കിലോ
സവാള- 4 എണ്ണം ചെറുതായി അരിഞ്ഞത്
തക്കാളി- 2 എണ്ണം അരിഞ്ഞത്
ഇഞ്ചി, വെളുത്തുള്ളി, പച്ചമുളക് ചതച്ചത്- 2 ടീസ്പൂൺ
മഞ്ഞപ്പൊടി- കാൽ ടീസ്പൂൺ
മുളക്‌പൊടി- ഒരു ടീസ്പൂൺ
കശ്മീരി മുളക്‌പൊടി- 1 ടീസ്പൂൺ
മല്ലിപ്പൊടി- 2 ടീസ്പൂൺ
ചിക്കൻ മസാല- 3 ടേബിൾ സ്പൂൺ
ഉപ്പ്- ആവശ്യത്തിന്
വെള്ളം- ആവശ്യത്തിന്
കറിവേപ്പില- ആവശ്യത്തിന്
വെളിച്ചെണ്ണ- ആവശ്യത്തിന്
നെയ്യ്- 1 ടേബിൾസ്പൂൺ (നിർബന്ധമില്ല)
തയാറാക്കുന്ന വിധം
ചിക്കൻ നന്നായി കഴുകി ചെറിയ കഷ്ണങ്ങളാക്കി കുറച്ച് ഉപ്പ്, 2 1/2 ടേബിൾ സ്പൂൺ ചിക്കൻ മസാല ചേർത്ത് നന്നായി യോജിപ്പിച്ച് വയ്ക്കുക. ഒരു ചുവട് കട്ടിയുളള പാത്രത്തിലേക്ക് 3 ടേബിൾ സ്പൂൺ വെളിച്ചെണ്ണ, 1 ടേബിൾസ്പൂൺ നെയ്യ് എന്നിവ ചേർക്കുക. നന്നായി ചൂടാകുമ്പോൾ ഇഞ്ചി, വെളുത്തുളളി, പച്ചമുളക് ചതച്ചത് ചേർത്ത് 1 മിനിറ്റ് ഇളക്കിയ ശേഷം ചിക്കൻ ഇട്ടുക. 5 മിനിട്ട് തീ കൂട്ടി വച്ച് നന്നായി വറുക്കുക. ഇടയ്ക്കിടെ ചിക്കൻ പൊടിഞ്ഞ്‌പോകാതെ നന്നായി ഇളക്കി വറുക്കുക.
മറ്റൊരു പാത്രത്തിൽ കുറച്ച് എണ്ണയൊഴിച്ച് സവാള നന്നായി വഴറ്റിയശേഷം മഞ്ഞൾപ്പൊടി, മുളക്‌പൊടി, കശ്മീരി മുളക്‌പൊടി, 1/2 ടേബിൾസ്പൂൺ ചിക്കൻ മസാല എന്നിവ ചേർത്ത് വഴറ്റുക. ശേഷം തക്കാളി കൂടെ ചേർത്ത് നന്നായി വഴറ്റിയെടുക്കുക.
ഈ മസാല വറുത്ത ചിക്കനിലേക്ക് ചേർക്കുക. മസാല ചേർക്കുമ്പോൾ തീ കൂട്ടിവയ്ക്കാൻ ശ്രദ്ധിക്കണം. ശേഷം നന്നായി ജോയിപ്പിക്കുക. ആവശ്യത്തിന് വെള്ളം ഒഴിച്ച് തിളപ്പിക്കണം. ആവശ്യത്തിന് കറിവേപ്പില ചേർത്ത് 5 മിനിറ്റ് ശേഷം തീ കുറച്ച ശേഷം അടച്ച് വെച്ച് വേവിക്കാം. വെള്ളം വറ്റി വേണ്ടുന്ന ഗ്രേവിയാകുമ്പോൾ കുറച്ച് കൂടി കറിവേപ്പില ചേർത്തി വാങ്ങി വയ്ക്കാം. എരിവ് കുറവാണെങ്കിൽ 2/3 പച്ചമുളക് നടുകെ കീറി ഇടാം. ടേസ്റ്റും കൂടും. അപ്പം, പൊറോട്ട, പുട്ട് എന്നിവയുടെ കൂടെയൊക്കെ നല്ല കോംബിനേഷൻ ആണ്. തീർച്ചയായും ഉണ്ടാക്കി നോക്കണേ.
