മലയാളി നഴ്സ് മക്കയിൽ മരിച്ചു. തലവേദനയെ തുടർന്ന് ആശുപത്രിയിൽ പ്രവേശിപ്പിക്കപ്പെട്ട മക്കയിലെ സ്വകാര്യ ആശുപത്രിയിൽ സ്റ്റാഫ് നഴ്സായ കോഴിക്കോട് മാവൂർ സ്വദേശിനി കൊടക്കാട്ടകത്ത് അസ്ന (29) ആണ് ശനിയാഴ്ച രാവിലെ 10-ന് മരിച്ചത്. മക്കയിലെ അൽനൂർ ആശുപത്രിയിലായിരുന്നു അന്ത്യം.
തലവേദനയെ തുടർന്ന് വെള്ളിയാഴ്ച വൈകീട്ടാണ് ആശുപത്രിയിൽ പ്രവേശിപ്പിച്ചത്. ഇന്ന് പുലർച്ചെ ആരോഗ്യ സ്ഥിതി വഷളായതോടെ അൽനൂർ ആശുപത്രിയിലേക്ക് മറ്റിയെങ്കിലും ജീവൻ രക്ഷിക്കാനായില്ല. തലച്ചോറിലുണ്ടായ രക്തസ്രാവമാണ് മരണകാരണമെന്നാണ് പ്രാഥമിക നിഗമനം.
മക്കയിൽ സെയിൽസ് മാനായി ജോലി ചെയ്യുന്ന നൗഷാദ് ആണ് ഭർത്താവ്. 20 ദിവസം മാത്രം പ്രായമായ ഒരു കുഞ്ഞടക്കം രണ്ട് ആൺകുട്ടികൾ ഉണ്ട്. നുവൈസർ, മുഹമ്മദ് എന്നിവരാണ് മക്കൾ. പരേതയായ കൊടക്കാട്ടകത്ത് കോയക്കുട്ടിയുടെ മകളാണ്. മാതാവ് കദീജ മക്കയിൽ ഉണ്ട്. മരണാനന്തര നടപടിക്രമങ്ങൾ പൂർത്തീകരിച്ച് മൃതദേഹം മക്കയിൽ ഖബറടക്കും.
