ഇൻസ്റ്റഗ്രാമിൽ ഫോളോവേഴ്സിന്റെ കാര്യത്തിൽ പ്രധാനമന്ത്രി നരേന്ദ്രമോദിയെ മറികടന്ന് നടി ശ്രദ്ധ കപൂർ. 91.4 മില്യൺ ഫോളോവേഴ്സാണ് ഇൻസ്റ്റഗ്രാമിൽ ശ്രദ്ധ കപൂറിന് നിലവിലുള്ളത്. 91.3 മില്യൺ പേരാണ് ഇൻസ്റ്റഗ്രാമിൽ മോദിയെ പിന്തുടരുന്നത്. മറ്റൊരു സാമൂഹികമാധ്യമ പ്ലാറ്റ്ഫോമായ എക്സിൽ ഏറ്റവുമധികം ഫോളോവേഴ്സുള്ള ലോകനേതാവാണ് മോദി. 101. 2 മില്യണിലധികം പേരാണ് മോദിയെ എക്സിലൂടെ പിന്തുടരുന്നത്.
ഇൻസ്റ്റഗ്രാമിൽ ഏറ്റവുമധികം ഫോളോവേഴ്സുള്ള മൂന്നാമത്തെ ഇന്ത്യൻ സെലിബ്രിറ്റിയാണ് ശ്രദ്ധ കപൂർ. ക്രിക്കറ്റ് താരം വിരാട് കോലിയും പ്രിയങ്ക ചോപ്രയുമാണ് ഇന്ത്യയിൽനിന്ന് ശ്രദ്ധയേക്കാൾ ഫോളോവേഴ്സുള്ള പ്രമുഖ വ്യക്തികൾ. ഓഗസ്റ്റ് 15 റിലീസ് ചെയ്ത സ്ത്രീ 2 സിനിമയുടെ വിജയത്തിന് പിന്നാലെയാണ് ശ്രദ്ധ കപൂറിന് പുതിയ നേട്ടം.
എക്സിൽ മറ്റ് ലോകനേതാക്കളേക്കാൾ ഏറെ മുന്നിലാണ് നരേന്ദ്ര മോദി. യുഎസ് പ്രസിഡന്റ് ജോ ബൈഡൻ, ദുബായ് ഭരണാധികാരി ശൈഖ് മുഹമ്മദ്, ഫ്രാൻസിസ് മാർപാപ്പ എന്നിവരേക്കാൾ ഫോളോവേഴ്സിന്റെ എണ്ണത്തിൽ മോദി ബഹുദൂരം മുന്നിലാണ്. ഓഫീസ് ഓഫ് ദ പ്രൈംമിനിസ്റ്റർ(പിഎംഒ) എന്ന എക്സ് അക്കൗണ്ടിന് 56 മില്യൺ ഫോളോവേഴ്സുണ്ട്. 26.7 മില്യൺ ഫോളോവേഴ്സുമായി കോൺഗ്രസ് നേതാവ് രാഹുൽ ഗാന്ധി, 27.6 മില്യൺ ഫോളോവേഴ്സുമായി ഡൽഹി മുഖ്യമന്ത്രി അരവിന്ദ് കെജ്രിവാൾ എന്നിവരാണ് എക്സിൽ ഏറ്റവുമധികം പേർ പിന്തുടരുന്ന ഇന്ത്യൻ നേതാക്കൾ.
