ബിബിസി ടോപ് ഗിയർ ഇന്ത്യ അവാർഡ് 2023ന് അർഹനായി പാൻ ഇന്ത്യൻ സൂപ്പർതാരം ദുൽഖർ സൽമാൻ. ഈ വർഷത്തെ പെട്രോൾഹെഡ് ആക്ടറിനുള്ള അവാർഡാണ് താരം സ്വന്തമാക്കിയത്. ചുപ് എന്ന ചിത്രത്തിലെ പ്രകടനമാണ് ദുൽഖറിനെ അവാർഡിന് അർഹനാക്കിയത്.
അടുത്തിടെയാണ് ദുൽഖർ സൽമാന് ദാദാസാഹിബ് ഫാൽക്കേ പുരസ്‌കാരം ലഭിച്ചത്. മികച്ച വില്ലൻ കഥാപാത്രത്തിനുള്ള പുരസ്‌കാരമായിരുന്നു ദുൽഖറിന് ലഭിച്ചത്. മലയാളത്തിലെ അഭിനേതാക്കളിൽ ഈ പുരസ്‌കാരം ലഭിക്കുന്ന ആദ്യത്തെ നടനാണ് ദുൽഖർ. ആർ ബൽകി രചനയും സംവിധാനവും നിർവഹിച്ച ചുപ്പ് സൈക്കോളജിക്കൽ ത്രില്ലർ വിഭാഗത്തിൽ പെടുന്നതാണ്. ദുൽഖറിന്റെ മൂന്നാമത്തെ ബോളിവുഡ് ചിത്രമായിരുന്നു ഇത്.
ബിഗ് ബജറ്റ് മാസ്സ് എന്റർടെയ്‌നർ ചിത്രം 'കിംഗ് ഓഫ് കൊത്ത'യാണ് ഇനി ദുൽഖറിന്റേതായി പുറത്തിറങ്ങാനുള്ള ചിത്രം. ഈ വർഷം ഓണം റിലീസ് ആണ് ചിത്രത്തിന്. ദുൽഖറിന്റെ എക്കാലത്തെയും വലിയ ബജറ്റിലൊരുങ്ങുന്ന ചിത്രം നിർമ്മിക്കുന്നത് വെഫേറർ ഫിലിംസും സീ സ്റ്റുഡിയോയും ചേർന്നാണ്. പ്രശസ്ത സംവിധായകൻ ജോഷിയുടെ മകൻ അഭിലാഷ് ജോഷിയാണ് ചിത്രം സംവിധാനം ചെയ്തിരിക്കുന്നത്.
