ഐപിഎല്ലിൽ പ്ലേ ഓഫ് ഉറപ്പാക്കാൻ ഹൈദരാബാദ്; ആധികാരിക വിജയത്തോടെ മടങ്ങാൻ ഗുജറാത്ത്
ഐപിഎല്ലിൽ പ്ലേ ഓഫ് ഉറപ്പാക്കാനുള്ള പോരിലാണ് ടീമുകൾ. ഇതിനായി ഇന്ന് കളത്തിലി‌റങ്ങുന്നത് സണ്‍റൈസേഴ്‌സ് ഹൈദരാബാദാണ്. ഗുജറാത്ത് ടൈറ്റന്‍സിനെതിരെയാണ് മത്സരം. ഹൈദരാബാദില്‍ വൈകിട്ട് ഏഴരയ്ക്കാണ് കളി. ജയിച്ചാൽ ഹൈദരാബാദിന് പ്ലേ ഓഫ് ഉറപ്പിക്കാനാവും ഒപ്പം രാജസ്ഥാനെ മറികടന്ന് രണ്ടാം സ്ഥാനത്ത് എത്താനും സാധിക്കും. 14 പോയിന്റ് വീതമുള്ള ചെന്നൈ സൂപ്പര്‍ കിംഗ്‌സ്, ഹൈദരാബാദ്, ഡല്‍ഹി കാപിറ്റല്‍സ്, 12 പോയിന്റ് വീതമുള്ള റോയല്‍ ചലഞ്ചേഴ്‌സ് ബംഗളൂരു, ലഖ്‌നൗ സൂപ്പര്‍ ജയന്റ്‌സ് എന്നി ടീമുകളാണ് പ്ലേ ഓഫ്നായി കിടപ്പിടിക്കുന്നത്.
എന്നാൽ കുറഞ്ഞ നെറ്റ് റണ്‍റേറ്റുള്ള ഡല്‍ഹി, ലഖ്‌നൗ ടീമുകളുടെ സാധ്യത വളരെ വിദൂരമാണ്. ഹൈദരാബാദ് ഒഴികെയുളളവര്‍ക്ക് ബാക്കിയുള്ളത് ഓരോ മത്സരം മാത്രമാണ്. ഡല്‍ഹിക്ക് ഇനി ഒരു മത്സരവും ബാക്കിയില്ല. ഇതുകൊണ്ടുതന്നെ പ്ലേ ഓഫിനോട് അടുത്തുനില്‍ക്കുന്നത് രണ്ട് മത്സരം കൈയിലുള്ള ഹൈദരാബാദാണ്. ഗുജറത്തിന്റെ പ്രതീക്ഷകൾ എല്ലാം നേരത്തെ അവസാനിച്ചതാണ്. ഇനിയിപ്പോൾ ഏക ലക്ഷ്യം ആധികാരിക വിജയം മാത്രം.