ദുബായ് ഗ്ലോബൽ വില്ലേജിൽ ‘ലവ് എമിറേറ്റ്‌സ്’ രണ്ടാം പതിപ്പ് ആരംഭിച്ചു

യുഎഇയോടുള്ള സ്നേഹവും കടപ്പാടും പൊതുജനങ്ങളിൽ ശക്തിപ്പെടുത്തുന്നതിനായി ജി.ഡി.ആർ.എഫ്.എ ദുബായ് സംഘടിപ്പിക്കുന്ന ‘ലവ് എമിറേറ്റ്‌സ്’ പരിപാടിയുടെ രണ്ടാം പതിപ്പ് ഗ്ലോബൽ വില്ലേജിൽ ആരംഭിച്ചു. കഴിഞ്ഞ വർഷത്തെ ഒന്നാം പതിപ്പിന് സ്വദേശികൾ നിന്നും വിദേശികൾ നിന്നും ലഭിച്ച വലിയ സ്വീകാര്യതയെ തുടർന്നാണ് വർഷത്തെ പരിപാടി കൂടുതൽ വിപുലമായി സംഘടിപ്പിക്കുന്നത്.യു എ ഇ കമ്മ്യൂണിറ്റി വർഷത്തിന്റെ പരിപാടികളുടെയും ഭാഗമായാണ് സംരംഭം

ഗ്ലോബൽ വില്ലേജിലെ യൂറോപ്യൻ പവിലിയന്റെ എതിർവശത്ത് പ്രത്യേകം ഒരുക്കിയിരിക്കുന്ന പവിലിയൻ നവംബർ 20 മുതൽ 30 വരെ സന്ദർശകർക്കാരെ സ്വീകരിക്കും. എല്ലാ ദിവസവും വൈകിട്ട് 4 മണി മുതൽ രാത്രി 11 മണി വരെ പ്രവർത്തിക്കുന്ന പവിലിയനിൽ സന്ദർശകർക്ക് യുഎഇയോടുള്ള നന്ദിയും സ്നേഹവും രേഖപ്പെടുത്താനും, സന്ദേശങ്ങൾ ഭിത്തികളിൽ പ്രദർശിപ്പിക്കാനും, ചിത്രങ്ങൾ പകർത്തി സോഷ്യൽ മീഡിയയിൽ #LoveEmirates ഹാഷ്‌ടാഗോടെ പങ്കുവെക്കാനും അവസരമുണ്ട്. മാത്രവുമല്ല ഇവിടെനിന്ന് വിവിധ സ്മരണിക സമ്മാനങ്ങളും സന്ദർശകർക്ക് ലഭിക്കും.

യുഎഇ തങ്ങളുടെ ജീവിതത്തിൽ നൽകിയ സുരക്ഷിതത്വം, അവസരങ്ങൾ, സഹിഷ്ണുത, സൗഹാർദം എന്നിവയെക്കുറിച്ചുള്ള വ്യക്തിപരമായ അനുഭവങ്ങൾ എഴുതാനാകുന്ന ഈ വേദി, പ്രവാസികളും പൗരന്മാരും ഒരുപോലെ പങ്കുചേരുന്ന ഒരു മനോഹര പ്ലാറ്റ്ഫോമാണ്. കഴിഞ്ഞ വർഷം ആയിരക്കണക്കിന് സന്ദേശങ്ങൾ പവിലിയൻ മുഴുവൻ നിറച്ചതിനെ തുടർന്ന്, ഇത്തവണ അതിൽനിന്നും കൂടുതൽ പങ്കാളിത്തം പ്രതീക്ഷിക്കുന്നതായി ജനറൽ ഡയറക്ടറേറ്റ് അറിയിച്ചു.

യുഎഇയോടുള്ള സ്നേഹവും രാജ്യത്തിന്റെ ആഗോള ഖ്യാതി വർദ്ധിപ്പിക്കുന്നതിൽ ജനങ്ങളുടെ പങ്കും എടുത്തു കാണിക്കുക എന്നതാണ് ഈ സംരംഭത്തിന്റെ പ്രധാന ലക്ഷ്യം. പൗരന്മാർക്കും താമസക്കാർക്കും സന്ദർശകർക്കും യുഎഇയോടുള്ള തങ്ങളുടെ അടുപ്പവും സ്നേഹവും സർഗാത്മകമായി പ്രകടിപ്പിക്കാൻ ‘ലവ് എമിറേറ്റ്സ്’ അവസരം നൽകുന്നു.ഈ സംരംഭം വഴി, യുഎഇയുടെ വിജയത്തിന് കാരണമായ ഓരോ വ്യക്തിയുടെയും രാജ്യത്തോടുള്ള സ്നേഹത്തെക്കുറിച്ചുള്ള യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ വാക്കുകളെ ജി ഡി ആർ എഫ് എ ദുബായ് ഊട്ടിയുറപ്പിക്കുന്നു.

ഗ്ലോബൽ വില്ലേജ് സീസൺ 30-ന്റെ ഭാഗമായ ഈ പരിപാടി, വൈവിധ്യവും ഐക്യവും ഒരുമിപ്പിക്കുന്ന യുഎഇയുടെ യഥാർത്ഥ സ്വഭാവം മികച്ച രീതിയിൽ പ്രതിഫലിപ്പിക്കുന്നു. ലോകത്തിന്റെ വിവിധ സംസ്കാരങ്ങൾ ഒന്നിക്കുന്ന ഈ വേദിയിൽ ‘ലവ് എമിറേറ്റ്‌സ്’ സംരംഭം ഒരു പ്രത്യേക അനുഭവമായിമായിരിക്കുമെന്നും അധികൃതർ വ്യക്തമാക്കി.

നവംബർ 20 മുതൽ 30 വിവിധ പ്രവർത്തനങ്ങളോടൊപ്പം ഡിജിറ്റൽ അനുഭവങ്ങളും, പ്രത്യേക വീഡിയോകളും ദൃശ്യ ഉള്ളടക്കങ്ങളും വിവിധ പ്ലാറ്റ്‌ഫോമുകളിൽ പങ്കുവെക്കപ്പെടും. സമൂഹ ഐക്യം, ദേശീയ തിരിച്ചറിവ്, ജനങ്ങളും സർക്കാർ സ്ഥാപനങ്ങളും തമ്മിലുള്ള ബന്ധം എന്നിവ ശക്തിപ്പെടുത്തുന്നതും ഇതിന്റെ ഭാഗമാണ്

ജീവിത നിലവാരം മെച്ചപ്പെടുത്തുകയും രാജ്യത്തിന്റെ ആഗോള സാന്നിധ്യം ശക്തമാക്കുകയും ചെയ്യുന്ന സ്ഥാപന ദൗത്യവുമായി ഒത്തു ചേർന്നാണ് ഈ സംരംഭം മുന്നോട്ട് പോകുന്നതെന്ന് ജി.ഡി.ആർ.എഫ്.എ ദുബായ് വ്യക്തമാക്കി.