സായിദ് നാഷനൽ മ്യൂസിയം ഡിസംബർ മൂന്നിന് പൊതുജനങ്ങൾക്കായി തുറക്കും

യുഎഇയുടെ സ്ഥാപക പിതാവ് ഷെയ്ഖ് സായിദ് ബിൻ സുൽത്താൻ അൽ നഹ്യാനെ ആദരിക്കുന്ന സായിദ് നാഷനൽ മ്യൂസിയം ഡിസംബർ മൂന്നിന് പൊതുജനങ്ങൾക്കായി തുറക്കും. യുഎഇയുടെ ദേശീയ മ്യൂസിയമായ ഇത് സഅദിയാത്ത് കൾച്ചറൽ ഡിസ്ട്രിക്റ്റിന്റെ ഹൃദയഭാഗത്താണ് സ്ഥിതി ചെയ്യുന്നത്.

പുരാതന കാലം മുതൽ ഇന്നുവരെയുള്ള യുഎഇയുടെ ചരിത്രം ഒരു സമഗ്രമായ യാത്രാനുഭവത്തിലൂടെ മ്യൂസിയം സന്ദർശകർക്ക് മുന്നിൽ അവതരിപ്പിക്കും. പുരാവസ്തുക്കളും ചരിത്രപരമായ വസ്തുക്കളും ഓഡിയോവിഷ്വൽ അനുഭവങ്ങളും സമകാലിക ഇൻസ്റ്റാളേഷനുകളും ഇവിടെ സംയോജിപ്പിച്ചിരിക്കുന്നു. സാംസ്‌കാരിക പൈതൃകം, വിദ്യാഭ്യാസം, ദേശീയ സ്വത്വം എന്നിവയോടുള്ള ഷെയ്ഖ് സായിദിന്റെ പ്രതിബദ്ധതയെ മ്യൂസിയം ആദരിക്കുന്നുവെന്ന് സാംസ്‌കാരിക വിനോദസഞ്ചാര വകുപ്പ് ചെയർമാൻ മുഹമ്മദ് ഖലീഫ അൽ മുബാറക് പറഞ്ഞു. ചരിത്രവും നവീകരണവും ഒത്തുചേരുന്ന ഈ ഇടം, വരും തലമുറയ്ക്ക് വിജ്ഞാനത്തിന്റെയും പ്രചോദനത്തിന്റെയും ഉറവിടമാകും.

പ്രിറ്റ്സ്‌കർ പ്രൈസ് ജേതാവായ ലോർഡ് നോർമൻ ഫോസ്റ്ററാണ് മ്യൂസിയം രൂപകൽപന ചെയ്തത്. ഷെയ്ഖ് സായിദിന്റെ ജീവിതവും നേതൃത്വവും സമർപ്പിച്ച ‘ഔർ ബിഗിനിങ്’ എന്ന ഗാലറിയിൽ നിന്നാണ് സന്ദർശക യാത്ര ആരംഭിക്കുക. രാജ്യത്തെ വൈവിധ്യമാർന്ന ഭൂപ്രകൃതികൾ, 300,000 വർഷം പഴക്കമുള്ള ചരിത്രം, അറബിക് ഭാഷയുടെ വികാസം, ഇസ്ലാമിന്റെ ആവിർഭാവം തുടങ്ങിയവ വിവരിക്കുന്ന മറ്റ് ഗാലറികളും മ്യൂസിയത്തിലുണ്ട്.

മ്യൂസിയത്തിന്റെ ശേഖരത്തിൽ 3,000ത്തിലധികം വസ്തുക്കളുണ്ട്. ഇതിൽ 1,500 എണ്ണം പ്രദർശനത്തിനുണ്ടാകും. ലൂവ്ര് അബുദാബിക്കും നാച്ചുറൽ ഹിസ്റ്ററി മ്യൂസിയത്തിനും ഇടയിലുള്ള ‘അൽ മസാർ ഗാർഡൻ’ എന്ന ഔട്ട്ഡോർ ഗാലറിയിലൂടെയാണ് സന്ദർശകരെ മ്യൂസിയം പ്രവേശന കവാടത്തിലേക്ക് സ്വാഗതം ചെയ്യുന്നത്. ഇവിടെ ഷെയ്ഖ് സായിദിന്റെ ജീവിതം അടയാളപ്പെടുത്തുന്ന ശിൽപങ്ങളും ഫലജ് ജലസേചന സംവിധാനവും ഉൾപ്പെടുത്തിയിട്ടുണ്ട്. എർത്ത് റസ്റ്ററൻറ് ഉൾപ്പെടെയുള്ള ഭക്ഷണശാലകളും മ്യൂസിയത്തിൽ സജ്ജീകരിച്ചിരിക്കുന്നു. ലൂവ്ര് അബുദാബി, ടീം ലാബ് ഫിനോമിന, നാച്ചുറൽ ഹിസ്റ്ററി മ്യൂസിയം, ഗുഗ്ഗൻഹൈം അബുദാബി തുടങ്ങിയ പ്രമുഖ സ്ഥാപനങ്ങളോടൊപ്പമാണ് സായിദ് നാഷനൽ മ്യൂസിയവും സഅദിയാത്ത് കൾച്ചറൽ ഡിസ്ട്രിക്റ്റിൽ സ്ഥാനം പിടിക്കുന്നത്.