ദുബായിലെ ഇബ്നു ബത്തൂത്ത മാളിൽ ജിഡിആർഎഫ്എയുടെ “നിങ്ങൾക്കായി, ഞങ്ങൾ ഇവിടെയുണ്ട്” ക്യാമ്പയിൻ ആരംഭിച്ചു

ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സ് (ജിഡിആർഎഫ്എ) ഇബ്നു ബത്തൂത്ത മാളിൽ “നിങ്ങൾക്കായി, ഞങ്ങൾ ഇവിടെയുണ്ട്” ( We are here, for you ) എന്ന പേരിലുള്ള ഉപഭോക്തൃ കേന്ദ്രീകൃത ക്യാമ്പയിൻ ആരംഭിച്ചു. ദുബായിലെ വിവിധ വീസ സേവനങ്ങളും മറ്റ് നടപടിക്രമങ്ങളും പൊതുജനങ്ങളെ പരിചയപ്പെടുത്തുന്നതിന്റെ ഭാഗമായാണ് ക്യാമ്പയിന്

എല്ലാം മാസവും എമിറേറ്റിലെ വിവിധ സ്ഥലങ്ങളിൽ ഡിപ്പാർട്ട്മെന്റ് പ്രത്യേക ഫ്ലാറ്റ്‌ഫോം സ്ഥാപിച്ചു തങ്ങളുടെ സേവനങ്ങൾ പരിചയപ്പെടുത്താറുണ്ട്. ഇതിന്റെ തുടർച്ചയായാണ് ഇബ്നു ബത്തൂത്ത മാളിലെ ബോധവൽക്കരണം . രാവിലെ 10 മണി മുതൽ രാത്രി 10 മണി വരെ നടക്കുന്ന ഈ പരിപാടി ഞായറാഴ്ച സമാപിക്കും.

ഈ ക്യാമ്പയിൻ വഴി ദുബായിയിലെ വിസ പ്രോസസ്സിംഗ്, എക്സിറ്റ് പെർമിറ്റുകൾ, ഗോൾഡൻ റെസിഡൻസി, എൻട്രി പെർമിറ്റുകൾ എന്നിവയുൾപ്പെടെയുള്ള വിവിധ സേവനങ്ങളുടെ നടപടിക്രമങ്ങൾ പൊതുജനങ്ങൾക്ക് പരിചയപ്പെടുത്തുന്നു.മൊബൈൽ ആപ്ലിക്കേഷൻ, വെബ്‌സൈറ്റ് എന്നിവയിലൂടെ ജിഡിആർഎഫ്എയുടെ സ്മാർട്ട് സേവനങ്ങളിലേക്കുള്ള ലഭ്യതയെക്കുറിച്ചും എളുപ്പത്തിലുള്ള ആക്‌സസ്‌ കുറിച്ചും ക്യാമ്പയിൻ പ്രദർശിപ്പിക്കും. കൂടാതെ, ഗോൾഡൻ റെസിഡൻസിയുടെയും സ്മാർട്ട് ഗേറ്റ് സേവനങ്ങളുടെയും നേട്ടങ്ങൾ പ്രദർശിപ്പിക്കുന്നതിനൊപ്പം ഇന്ത്യൻ പൗരന്മാർക്കുള്ള പ്രത്യേക വിസകളെക്കുറിച്ചുള്ള അറിവും പരിചയപ്പെടുത്തുന്നുണ്ട്

ഉപയോക്തൃ അനുഭവം മെച്ചപ്പെടുത്തുന്നതിനായി നൂതനവും ഉപയോക്തൃ സൗഹൃദവുമായ സേവനങ്ങൾ നൽകുന്നതിനുള്ള ജിഡിആർഎഫ്എ ദുബായിയുടെ ശ്രമങ്ങളുടെ ഭാഗമാണ് ഈ ക്യാമ്പയിൻ. “പൊതുജനങ്ങൾക്ക് ഞങ്ങളുടെ സേവനങ്ങളെക്കുറിച്ച് മനസിലാക്കിക്കൊടുക്കുക എന്നതാണ് ‘ഞങ്ങൾ ഇവിടെയുണ്ട്’ എന്ന ബോധവൽക്കരണ ക്യാമ്പയിന്റെ പ്രധാന ലക്ഷ്യം” എന്ന് ജിഡിആർഎഫ്എ ഡയറക്ടർ ജനറൽ ലഫ്റ്റനന്റ് ജനറൽ മുഹമ്മദ് അഹ്മദ് അൽ മർറി പറഞ്ഞു.

ഇബ്നു ബത്തൂത്ത മാളിൽ എത്തുന്ന സന്ദർശകരെ ഈ ക്യാമ്പയിന്റെ വിവിധ സംവേദനാത്മക പ്രവർത്തനങ്ങളിൽ പങ്കെടുക്കാൻ പ്രോത്സാഹിപ്പിക്കുന്നു.വിവിധ മത്സരങ്ങൾ, കുട്ടികളുടെ ഡ്രോയിംഗ് കോണുകൾ, എന്നിവ ഇതിന്റെ ഭാഗമായി നടക്കുന്നു. സന്ദർശകർക്ക് കാമ്പെയ്‌നിലെ മാസ്‌കറ്റ് കഥാപാത്രങ്ങളായ സാലം , സലാമ എന്നിവരെ കാണാനും സംവദിക്കാനും ഫോട്ടോ എടുക്കാനും അവസരം ലഭിക്കും .മത്സര വിജയികൾക്ക് സമ്മാനങ്ങളുമുണ്ട്. ആധുനികവും കാര്യക്ഷമവും ആക്സസ് ചെയ്യാവുന്നതുമായ സേവനങ്ങളിലൂടെ ഉപയോക്താക്കളുടെ വികസിച്ചുകൊണ്ടിരിക്കുന്ന ആവശ്യങ്ങൾ നിറവേറ്റുന്നതിനുള്ള ദുബായ് റെസിഡൻസിയുടെ പ്രതിബദ്ധതയാണ് സംരംഭം. പൊതുജനങ്ങളുമായി നേരിട്ട് ഇടപഴകുന്നതിലൂടെ, എല്ലാ താമസക്കാർക്കും സന്ദർശകർക്കും സുഗമമായ അനുഭവം ഉറപ്പാക്കിക്കൊണ്ട്, ഡിജിറ്റൽ സംവിധാനങ്ങളെ കുറിച്ച് കൂടുതൽ അവബോധവും ഉപയോഗവും വളർത്തിയെടുക്കാൻ ഈ പ്രചരണങ്ങളിലൂടെ ജി ഡി ആർ എഫ് എ ലക്ഷ്യമിടുന്നു.