ഡോണൾഡ് ട്രംപ് അബുദാബിയിൽ; സ്വീകരിച്ച് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ

യുഎസ് പ്രസിഡന്റ് ഡോണൾഡ് ട്രംപ് ഔദ്യോഗിക സന്ദർശനത്തിനായി യുഎഇയിലെത്തി. അബുദാബിയിലെത്തിയ ട്രംപിനെ യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ സ്വീകരിച്ചു. അമേരിക്കൻ പ്രസിഡന്റിനൊപ്പം എത്തിയ ഔദ്യോഗിക പ്രതിനിധി സംഘത്തിനും ഷെയ്ഖ് മുഹമ്മദ് ഹൃദ്യമായ സ്വീകരണം നൽകി.

അബുദാബി ഉപ ഭരണാധികാരിയും ദേശീയ സുരക്ഷാ ഉപദേശകനുമായ ഷെയ്ഖ് തഹ്നൂൻ ബിൻ സായിദ് അൽ നഹ്യാൻ, വിദേശകാര്യ മന്ത്രിയും ഉപ പ്രധാനമന്ത്രിയുമായ ഷെയ്ഖ് അബ്ദുല്ല ബിൻ സായിദ് അൽ നഹ്യാൻ, യുഎഇ പ്രസിഡന്റ് ഓഫിസിന്റെ ഉപദേശകനായ ഷെയ്ഖ് മുഹമ്മദ് ബിൻ ഹമദ് ബിൻ തഹ്നൂൻ, പ്രസിഡന്റിന്റെ തന്ത്രപ്രധാന ഓഫിസ് ചെയർമാൻ ഡോ. അഹമ്മദ് മുബാറക് അൽ മസ്രൂഇ, എക്‌സിക്യൂട്ടീവ് അഫയേഴ്‌സ് അതോറിറ്റിയുടെ ചെയർമാൻ ഖൽദൂൻ ഖലീഫ അൽ മുബാറക്, യുഎസ്-യുഎഇ ബന്ധത്തിന്റെ മുഖ്യ പ്രതിനിധി യൂസഫ് അൽ ഒതൈബ, മറ്റ് മുതിർന്ന ഉദ്യോഗസ്ഥർ എന്നിവർ ചടങ്ങിൽ പങ്കെടുത്തു.

ട്രംപിന്റെ രണ്ടാം പ്രസിഡൻഷ്യൽ കാലാവധിയിലെ ആദ്യ മധ്യപൂർവദേശ സന്ദർശനത്തിന്റെ ഭാഗമായി ഖത്തറിനും സൗദിക്കും ശേഷമാണ് ട്രംപിന്റെ യുഎഇ സന്ദർശനം. വ്യാപാര, സാങ്കേതിക, തന്ത്രപരമായ മേഖലകളിൽ യുഎസ്-യുഎഇ ബന്ധം ശക്തിപ്പെടുത്തുന്നതിനുള്ള പ്രധാന നീക്കമാണിത്.