മേഖലയിലെ സുരക്ഷയും സ്ഥിരതയും ലക്ഷ്യമിട്ടുള്ള നീക്കങ്ങളിൽ ഇറാനെ പിന്തുണയ്ക്കുമെന്ന് യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ വ്യക്തമാക്കി. ഇറാൻ പ്രസിഡന്റ് ഡോ. മസൂദ് പെസെഷ്കിയാനുമായി നടത്തിയ ടെലിഫോൺ സംഭാഷണത്തിലാണ് അദ്ദേഹം ഇക്കാര്യം അറിയിച്ചത്.മിഡിൽ ഈസ്റ്റിൽ സുസ്ഥിരമായ സമാധാനം നിലനിർത്തുന്നതിനും സുരക്ഷ ഉറപ്പാക്കുന്നതിനും ആവശ്യമായ എല്ലാ പ്രവർത്തനങ്ങൾക്കും യുഎഇയുടെ പൂർണ്ണ പിന്തുണ ഷെയ്ഖ് മുഹമ്മദ് വാഗ്ദാനം ചെയ്തു.യുഎഇയും ഇറാനും തമ്മിലുള്ള ഉഭയകക്ഷി ബന്ധം മെച്ചപ്പെടുത്തുന്നതിനെക്കുറിച്ചും വിവിധ മേഖലകളിൽ സഹകരണം വർദ്ധിപ്പിക്കുന്നതിനെക്കുറിച്ചും നേതാക്കൾ സംസാരിച്ചു.
നിലവിലെ പ്രാദേശിക, അന്തർദേശീയ സാഹചര്യങ്ങൾ ചർച്ച ചെയ്ത നേതാക്കൾ, ഇത്തരം വിഷയങ്ങളിൽ നയതന്ത്രപരമായ സമീപനം സ്വീകരിക്കേണ്ടതിന്റെ പ്രാധാന്യം ചൂണ്ടിക്കാട്ടി. പ്രശ്നപരിഹാരത്തിന് സംവാദങ്ങൾക്കും നയതന്ത്ര ചർച്ചകൾക്കും മുൻഗണന നൽകണമെന്ന് ഇരുരാജ്യങ്ങളും അഭിപ്രായപ്പെട്ടു.മേഖലയിലെ ജനങ്ങളുടെ താല്പര്യങ്ങൾ സംരക്ഷിക്കുന്നതിനും വികസനം ഉറപ്പാക്കുന്നതിനും അയൽരാജ്യങ്ങൾ തമ്മിലുള്ള സഹകരണം ശക്തമാക്കാൻ ചർച്ചയിൽ തീരുമാനമായി.
