രാജസ്ഥാന്റെ പുതിയ സൂര്യോദയം; പതിനാലുകാരൻ വൈഭവിനെ പ്രശംസിച്ച് ഇതിഹാസങ്ങൾ

ഐപിഎൽ ആരാധകർ ഒരേപോലെ ഉരുവിടുന്ന പേര് ‘വൈഭവ് സൂര്യവംശി’. ഗുജറാത്തിനെതിരെ ഇന്നലെ നടന്ന മത്സരത്തിൽ പുതു ചരിത്രം കുറിച്ച വൈഭവ് സൂര്യവംശിയെന്ന രാജസ്ഥാൻ റോയൽസിന്റെ പതിനാലുകാരൻ ചെക്കനെ പ്രശംസിക്കുന്ന തിരക്കിലാണ് ഇന്ത്യയുടെ ഇതിഹാസങ്ങൾ. ഒരു 14 വയസുകാരനിൽ നിന്ന് പ്രതീക്ഷിച്ചതിലും അപ്പുറമാണ് കഴിഞ്ഞ ദിവസം മൈതാനത്ത് കാണാൻ സാധിച്ചത്. 38 പന്തിൽ 101 റൺസ് നേടി രാജസ്ഥാൻ റോയൽസിന്റെ വിജയശില്പിയായി വൈഭവ് മാറുമ്പോൾ പ്രശംസയുമായി ആദ്യം എത്തിയത് ക്രിക്കറ്റ് ദൈവം സച്ചിൻ ടെണ്ടുൽക്കർ. പിന്നാലെ ഇതിഹാസങ്ങളായ യൂസഫ് പത്താൻ, യുവരാജ് സിങ്, ഹർഭജൻ സിങ്, രോഹിത് ശർമ, തുടങ്ങി നിരവധിപേർ വൈഭവിനെ പ്രശംസിച്ച് രംഗത്തെത്തി. ഗുജറാത്ത് ടൈറ്റൻസ് – രാജസ്ഥാൻ റോയൽസ് മത്സരം റോയൽസിന്റെ ഹോം ഗ്രൗണ്ടിൽവെച്ചാണ് നടന്നത്. ഈ സീസണിൽ ഇതുവരെ ഒരു നല്ല ഇന്നിങ്സ് റോയൽസ് കാഴ്ചവെച്ചിരുന്നില്ല. തുടർ തോൽവികൾ റോയൽസിനെ പോയിന്റ് പട്ടികയിൽ ഒൻപതാം സ്ഥാനത്തേക്ക് തള്ളിയിരുന്നു.

എന്നാൽ ഈ പതിനാലുകാരൻ അവിടെയും റോയൽസിനും ആരാധകർക്കും പ്രതീക്ഷ നൽകുകയാണ്. 20 ഓവറിൽ 209 റൺസ് നേടിയ ഗുജറാത്തിനെ മറികടന്ന് റോയൽസ് ജയം സ്വന്തമാക്കുന്നത് 15.5 ഓവറിൽ ആണ്. പതിനൊന്നാം ഓവറിലാണ് റോയൽസിന് വൈഭവന്റെ വിക്കറ്റ് നഷ്ടമാകുന്നത്. പക്ഷെ അപ്പോഴേക്കും പതിനാലുകാരൻ 38 പന്തിൽ 101 റൺസ് നേടി സകല റെക്കോഡുകളും സ്വന്തമാക്കിയിരുന്നു.

ഭയമില്ലാതെ പന്തിനെ നേരിട്ട വൈഭവിനെയാണ് സച്ചിൻ എന്ന ഇതിഹാസം കണ്ടത്. വൈഭവന്റെ ബാറ്റിങ് വേഗതയെക്കുറിച്ചും ആദ്യമേ തന്നെ ലെങ്ത് തിരഞ്ഞെടുക്കുന്നതിന് കുറിച്ചും ഓരോ പന്തും നേരിടുന്നതിൽ നൽകുന്ന ഊർജത്തെ കുറിച്ചും ഇതിഹാസം എടുത്തുപറഞ്ഞു. സൂപ്പർ സ്റ്റാർ പദവി നൽകിയാണ് ഹർഭജൻ സിംഗിന്റെ പോസ്റ്റ് എത്തുന്നത്.

തന്റെ റെക്കോഡ് പഴങ്കഥയാക്കിയ മിടുക്കൻ പ്രശംസിക്കാൻ യുസഫ് പത്താനും എത്തി. ഏറ്റവും വേഗത്തിൽ ഐപിഎല്ലിൽ സെഞ്ചുറി നേടുന്ന ആദ്യ ഇന്ത്യൻ താരം യുസഫ് പത്താൻ ആയിരുന്നു. എന്നാൽ ഇന്നലെ വൈഭവ് അതും പഴങ്കഥയാക്കി. ഈ കാര്യം പ്രത്യേകം എടുത്തുപറഞ്ഞാണ് പത്താൻ എത്തിയത്.

14 വയസ്സിൽ നിങ്ങൾ എന്ത് ചെയ്യുകയായിരുന്നു, എന്ന ചോദ്യവുമായി ആണ് യുവരാജ് സിങ് എത്തിയത്.

അതേസമയം 14 വർഷവും 32 ദിവസവും പ്രായമുള്ള വൈഭവ് നിലവിൽ ടി20 ഫോർമാറ്റിൽ സെഞ്ചുറി നേടുന്ന ഏറ്റവും പ്രായം കുറഞ്ഞ താരമാണ്. 2013-ൽ മുംബൈയ്ക്കെതിരെ 18 വർഷവും 118 ദിവസവും പ്രായമുള്ളപ്പോൾ സെഞ്ചുറി നേടിയ മഹാരാഷ്ട്രയുടെ വിജയ് സോളിന്റെ റെക്കോഡാണ് വൈഭവ് മറികടന്നത്.

റോയൽ ചലഞ്ചേഴ്സ് ബാംഗ്ലൂരിനായി ക്രിസ് ഗെയിൽ 30 പന്തിൽ സെഞ്ചുറി കുറിച്ച് അതിവേഗം സെഞ്ചുറി നേടുന്ന താരങ്ങളുടെ പട്ടികയിൽ ഒന്നാമതാണ്. ഈ പട്ടികയിൽ ആണ് രണ്ടാം സ്ഥാനത്ത് വൈഭവ് തന്റെ പേര് എഴുതിച്ചേർത്തത്. ഇതോടെ റോയൽസിന് പ്ലേ ഓഫ് പ്രതീക്ഷ നൽകുകയാണ് ഈ പതിനാലുകാരൻ. ഇനി അവശേഷിക്കുന്ന നാല് മത്സരങ്ങളിൽ കൂടി റോയൽസ് വൈഭവിനെ കൂട്ടുപിടിച്ച് ഇതേ പ്രകടനം കാഴ്ചവെച്ചാൽ പ്ലേ ഓഫിലേക്കും എത്തിച്ചേരാൻ സാധിക്കും.