യു.പി.ഐ പണമിടപാടുകൾക്ക് ഇനി പിൻ നമ്പർ വേണ്ട; പകരം ബയോമെട്രിക് ഒതൻറിക്കേഷൻ

യു.പി.ഐ ഇടപാടുകൾക്ക് ഇനി പിൻ നമ്പർ വേണ്ട; ബയോമെട്രിക് ഓതന്റിക്കേഷൻ വരുന്നു. ഈ പശ്ചാത്തലത്തിൽ, യു.പി.ഐ സംവിധാനത്തിൽ നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യ (എൻ.പി.സി.ഐ) പുതിയ മാറ്റങ്ങൾ പ്രഖ്യാപിച്ചിരിക്കുകയാണ്. ഉപയോക്താക്കൾക്ക് ഇനിമുതൽ ഇടപാടുകൾ നടത്താൻ പിൻ നമ്പറുകൾ നൽകുന്നതിന് പകരം ബയോമെട്രിക് ഓതന്റിക്കേഷൻ സൗകര്യം ഉപയോഗിക്കാനാകും. അതായത്, മുഖം (Face), വിരലടയാളം (Fingerprint) എന്നിവ ഉപയോഗിച്ച് യു.പി.ഐ ഇടപാടുകൾ പൂർത്തിയാക്കാൻ ഉപയോക്താക്കൾക്ക് സാധിക്കും.

ഈ പുതിയ രീതി ഇന്ന് മുതൽ നടപ്പിലാക്കിത്തുടങ്ങും. ഏകീകൃത തിരിച്ചറിയൽ സംവിധാനമായ ആധാറിൽ സൂക്ഷിച്ചിട്ടുള്ള ബയോമെട്രിക് ഡാറ്റ ഉപയോഗിച്ചായിരിക്കും ഈ ഓതന്റിക്കേഷൻ നടപ്പിലാക്കുക. റിസർവ് ബാങ്ക് ഓഫ് ഇന്ത്യ, പരമ്പരാഗത പിൻ നമ്പറുകൾക്ക് പുറമെ ഇതര രീതികൾ ഉപയോഗിക്കാൻ അനുമതി നൽകിയതോടെയാണ് ഈ സുപ്രധാന നീക്കം.

രാജ്യത്തെ ലക്ഷക്കണക്കിന് ഉപയോക്താക്കളുടെ ഇടപാടുകൾ എളുപ്പവും വേഗത്തിലാക്കുന്നതിനും കൂടുതൽ സുരക്ഷ ഉറപ്പുവരുത്തുന്നതിനും ഈ പുതിയ രീതി സഹായകമാകും. ബയോമെട്രിക് സംവിധാനം നിലവിൽ വരുന്നതോടെ, യു.പി.ഐയുമായി ബന്ധപ്പെട്ടുള്ള സാമ്പത്തിക തട്ടിപ്പുകൾ ഒരു പരിധി വരെ നിയന്ത്രിക്കാൻ കഴിയുമെന്നാണ് അധികൃതർ പ്രതീക്ഷിക്കുന്നത്.