വനിതാ ലോകകപ്പിൽ പാകിസ്ഥാന് വീണ്ടും കനത്ത തോൽവി; ഓസ്ട്രേലിയയ്ക്ക് തകർപ്പൻ ജയം

വനിതാ ഏകദിന ലോകകപ്പിൽ പാകിസ്ഥാനെ 107 റൺസിന് തകർത്ത് ഓസ്ട്രേലിയ. ഓസ്ട്രേലിയ മുന്നോട്ടുവെച്ച 222 റൺസ് വിജയലക്ഷ്യം പിന്തുടർന്ന പാകിസ്ഥാൻ ടീം 114 റൺസിന് ഓൾഔട്ടായി. ഇതോടെ ലോകകപ്പിലെ പാകിസ്ഥാന്റെ തുടർച്ചയായ രണ്ടാം തോൽവിയായി ഇത്.

മറുപടി ബാറ്റിങ്ങിനിറങ്ങിയ പാകിസ്ഥാന്റെ തുടക്കം തന്നെ പാളി. 31 റൺസെടുക്കുന്നതിനിടെ തന്നെ ടീമിന് അഞ്ച് വിക്കറ്റുകൾ നഷ്ടമായി. 35 റൺസെടുത്ത സിദ്ര അമീൻ മാത്രമാണ് പാക് നിരയിൽ അൽപ്പം പിടിച്ചുനിന്നത്. നായിക ഫാത്തിമ സന 11 റൺസെടുത്ത് പുറത്തായി. ഓസ്ട്രേലിയക്കായി ബൗളിങ്ങിൽ കിം ഗാർത്ത് മൂന്ന് വിക്കറ്റുകൾ വീഴ്ത്തി മികച്ച പ്രകടനം കാഴ്ചവെച്ചു.

നേരത്തെ, ആദ്യം ബാറ്റ് ചെയ്ത ഓസ്ട്രേലിയ ഒരു ഘട്ടത്തിൽ 76 റൺസിന് ഏഴ് വിക്കറ്റ് എന്ന നിലയിൽ പരുങ്ങലിലായിരുന്നു. എന്നാൽ, ബെത്ത് മൂണിയുടെ സെഞ്ച്വറിയുടെയും (114 പന്തിൽ 109 റൺസ്) അലാനയുടെ അർധ സെഞ്ച്വറിയുടെയും (49 പന്തിൽ 51 റൺസ്) പിൻബലത്തിൽ ഓസീസ് നിശ്ചിത 50 ഓവറിൽ 9 വിക്കറ്റ് നഷ്ടത്തിൽ 221 റൺസെടുത്തു. ഈ കൂട്ടുകെട്ടാണ് ഓസ്ട്രേലിയയെ പൊരുതാവുന്ന സ്‌കോറിലേക്ക് എത്തിച്ചത്.