ഗുവാഹത്തിയിൽ നടന്ന രണ്ടാം ടെസ്റ്റിൽ ഇന്ത്യയെ 408 റൺസിന് തകർത്തുകൊണ്ട് ദക്ഷിണാഫ്രിക്ക രണ്ട് മത്സരങ്ങളടങ്ങിയ ടെസ്റ്റ് പരമ്പര 2-0ന് തൂത്തുവാരി. 549 റൺസ് എന്ന കൂറ്റൻ വിജയലക്ഷ്യം പിന്തുടർന്ന ഇന്ത്യ, രണ്ടാം ഇന്നിംഗ്സിൽ അവസാന ദിനം ലഞ്ചിന് മുമ്പ് വെറും 140 റൺസിന് ഓൾ ഔട്ടായാണ് 408 റൺസിന്റെ നാണംകെട്ട തോൽവി ഏറ്റുവാങ്ങിയത്. റൺസിന്റെ അടിസ്ഥാനത്തിൽ ഇന്ത്യയുടെ ടെസ്റ്റ് ചരിത്രത്തിലെ ഏറ്റവും വലിയ തോൽവിയാണിത്.
രണ്ടാം ഇന്നിംഗ്സിൽ ഇന്ത്യക്കായി രവീന്ദ്ര ജഡേജ മാത്രമാണ് പൊരുതിയത്. അദ്ദേഹം 54 റൺസ് നേടി. അഞ്ച് പേർ മാത്രം രണ്ടക്കം കടന്ന ഇന്ത്യൻ ഇന്നിംഗ്സിൽ, 139 പന്തുകൾ നേരിട്ട സായ് സുദർശൻ 14 റൺസും, ക്യാപ്റ്റൻ ഋഷഭ് പന്ത് 13 റൺസും, വാഷിംഗ്ടൺ സുന്ദർ 16 റൺസുമെടുത്ത് പുറത്തായി.
അവസാന ദിനം 27-ന് 2 എന്ന നിലയിലാണ് ഇന്ത്യ ക്രീസിലെത്തിയത്. 37 റൺസ് മാത്രം വഴങ്ങി ആറ് വിക്കറ്റെടുത്ത സിമോൺ ഹാർമറാണ് ഇന്ത്യൻ ബാറ്റിംഗ് നിരയെ കറക്കിവീഴ്ത്തിയത്. മാർക്കോ യാൻസൻ രണ്ട് വിക്കറ്റുകളും സെനുരാൻ മുത്തുസാമി, കേശവ് മഹാരാജ് എന്നിവർ ഓരോ വിക്കറ്റും വീതം വീഴ്ത്തി.
2000-ത്തിന് ശേഷം ആദ്യമായാണ് ദക്ഷിണാഫ്രിക്ക ഇന്ത്യയിൽ ഒരു ടെസ്റ്റ് പരമ്പര നേടുന്നത്. കൂടാതെ, ഇന്ത്യയുടെ ടെസ്റ്റ് ചരിത്രത്തിൽ നാട്ടിൽ വെച്ചുണ്ടാകുന്ന മൂന്നാമത്തെ മാത്രം വൈറ്റ് വാഷ് ആണിത്. 2000-ത്തിൽ ദക്ഷിണാഫ്രിക്കയും 2024-ൽ ന്യൂസിലൻഡുമാണ് ഇതിനുമുമ്പ് ഇന്ത്യയെ സ്വന്തം നാട്ടിൽ തൂത്തുവാരിയത്.
സ്കോർ നില: ദക്ഷിണാഫ്രിക്ക – 489, 260-5 ഇന്ത്യ – 201, 140.
Discover more from Radio Keralam 1476 AM News
Subscribe to get the latest posts sent to your email.
