ബി.സി.സി.ഐ.യുടെ പുതിയ വാർഷിക കരാറിൽ വിരാട് കോലിയുടെയും രോഹിത് ശർമയുടെയും പ്രതിഫലം കുറച്ചേക്കുമെന്ന് റിപ്പോർട്ട്. ടി20, ടെസ്റ്റ് ഫോർമാറ്റുകളിൽ ഇരുവരും സജീവമല്ലാത്ത സാഹചര്യത്തിൽ, ഇവരെ നിലവിലെ ‘എ പ്ലസ്’ കാറ്റഗറിയിൽ നിന്ന് ‘എ’ കാറ്റഗറിയിലേക്ക് താഴ്ത്താനാണ് ബി.സി.സി.ഐ. ഒരുങ്ങുന്നത്. ഈ മാറ്റം ഇരുവർക്കും പ്രതിവർഷം രണ്ട് കോടി രൂപയുടെ കുറവിന് കാരണമാകും.
എല്ലാ വർഷവും കളിക്കാരെ എ പ്ലസ്, എ, ബി, സി എന്നിങ്ങനെ നാല് കാറ്റഗറികളായി തിരിച്ചാണ് ബി.സി.സി.ഐ. കരാർ നൽകാറുള്ളത്. നിലവിൽ, ‘എ പ്ലസ്’ കാറ്റഗറിയിലുള്ള താരങ്ങൾക്ക് 7 കോടി രൂപയാണ് പ്രതിഫലം നൽകുന്നത്, എന്നാൽ ‘എ’ കാറ്റഗറിയിലുള്ളവർക്ക് 5 കോടി രൂപയായിരിക്കും ലഭിക്കുക. അതുകൊണ്ടാണ് 2 കോടി രൂപയുടെ കുറവ് സംഭവിക്കാൻ സാധ്യതയുള്ളത്. സാധാരണയായി, മൂന്ന് ഫോർമാറ്റുകളിലും (ഓൾ ഫോർമാറ്റ്) സ്ഥിരമായി കളിക്കുന്നവർക്കാണ് ‘എ പ്ലസ്’ കാറ്റഗറി ലഭിക്കാറ്.
ഇന്ത്യയുടെ ടെസ്റ്റ്, ഏകദിന ക്യാപ്റ്റനായ ശുഭ്മാൻ ഗിൽ ഈ വർഷം ‘എ പ്ലസ്’ കാറ്റഗറിയിലേക്ക് ഉയർത്തപ്പെടാൻ സാധ്യതയുണ്ട്. അതേസമയം, സ്ഥിരതയാർന്ന പ്രകടനം കാഴ്ചവെക്കാത്തതിൻ്റെ പേരിലും ഫിറ്റ്നസ് മാനദണ്ഡങ്ങൾ പാലിക്കാത്തതിനാലും ശ്രേയസ് അയ്യർ, ഇഷാൻ കിഷൻ എന്നിവരെ മുൻപ് കരാറിൽ നിന്ന് ഒഴിവാക്കിയിരുന്നു. മാച്ച് ഫീസിന് പുറമെയാണ് ഈ തുക പ്രതിഫലമായി നൽകുന്നത്. പരിശീലകനും ക്യാപ്റ്റനും സെലക്ഷൻ കമ്മിറ്റിയും ചേർന്നാണ് ഓരോ താരത്തിന്റെയും കാറ്റഗറി നിശ്ചയിക്കുന്നത്.
Discover more from Radio Keralam 1476 AM News
Subscribe to get the latest posts sent to your email.
