ഇംഗ്ലണ്ടിനെതിരായ രണ്ടാം ക്രിക്കറ്റ് ടെസ്റ്റിൽ ബാറ്റിംഗിനിടെ പിച്ചിലെ അപകട മേഖലയിൽ കൂടി ഓടിയതിന് ഇംഗ്ലണ്ട് ക്യാപ്റ്റൻ അമ്പയറോട് പരാതിപ്പെട്ട സംഭവത്തിൽ മറുപടിയുമായി രവീന്ദ്ര ജഡേജ. മത്സരത്തിൽ ജഡേജയും ഗില്ലും ബാറ്റ് ചെയ്യുന്നതിനിടെയാണ് ഇംഗ്ലണ്ട് ക്യാപ്റ്റൻ ബെൻ സ്റ്റോക്‌സ് ജഡേജക്കെതിരെ അമ്പയറോട് പരാതിപ്പെട്ടത്. ഇംഗ്ലണ്ടിനെതിരെ ബൗൾ ചെയ്യുമ്പോൾ സ്പിന്നർമാർക്ക് അധിക ആനുകൂല്യം കിട്ടാനായി ജഡേജ പിച്ചിലെ അപകട മേഖലയിൽ കൂടി ബോധപൂർവം ഓടി വിള്ളലുകൾ ഉണ്ടാക്കാൻ ശ്രമിക്കുന്നുവെന്നായിരുന്നു സ്റ്റോക്‌സിൻറെ പരാതി. എന്നാൽ രണ്ടാം ദിനത്തിലെ കളിക്കുശേഷം നടത്തിയ വാർത്താസമ്മേളനത്തിൽ ജഡേജ സ്റ്റോക്‌സിൻറെ ആരോപണം തള്ളി.
സ്റ്റോക്‌സ് കരുതിയത്, ഞാൻ പിച്ചിൽ വിള്ളലുകളുണ്ടാക്കാനായി മനപൂർവം പിച്ചിലെ അപകടമേഖലയിൽ കൂടി ഓടുന്നുവെന്നാണ്. അല്ലെങ്കിൽ തന്നെ ഇംഗ്ലണ്ട് പേസർമാർ അത് ചെയ്യുന്നുണ്ട്. പിന്നെ ഞാനായിട്ട് എന്തിനാണ് അത് ചെയ്യുന്നത്. എനിക്കത് ചെയ്യേണ്ട ആവശ്യമില്ല. ഞാൻ ബാറ്റ് ചെയ്യുമ്പോൾ സ്റ്റോക്‌സ് അമ്പയറോട് തുടർച്ചയായി പരാതി പറയുകയായിരുന്നു. എനിക്ക് അങ്ങനെ ഒരു ഉദ്ദേശവുമുണ്ടായിരുന്നില്ല. അബദ്ധത്തിൽ ഒന്നോ രണ്ടോ തവണ ഞാൻ അങ്ങനെ ഓടിയിട്ടുണ്ടാകാം. എന്നാൽ അത് ബോധപൂർവമായിരുന്നില്ലെന്നും ജഡേജ പറഞ്ഞു.
ബാറ്റിംഗിൽ മികച്ച പ്രകടനം നടത്താനായത് ബൗളിംഗിലും ആത്മവിശ്വാസം കൂട്ടുമെന്നും ജഡേജ വ്യക്തമാക്കി. ടീമിനായി ബാറ്റ് കൊണ്ട് സംഭാവന നൽകാൻ കഴിയുമ്പോൾ സന്തോഷമാണ്. പ്രത്യേകിച്ച് ഇന്ത്യക്ക് പുറത്ത് കളിക്കുമ്പോൾ. 210-5ൽ നിന്ന് വലിയൊരു സ്‌കോറിലേക്ക് ഇന്ത്യയെ എത്തിക്കുക എന്നത് വലിയ വെല്ലുവിളിയായിരുന്നു. ക്യാപ്റ്റനൊപ്പം പിടിച്ചുനിന്ന് വലിയൊരു കൂട്ടുകെട്ടുണ്ടാക്കാനായത് എനിക്ക് വലിയ ആത്മവിശ്വാമാണ് നൽകിയത്. വരും മത്സരങ്ങളിലും ഇതുപോലെ മികച്ച പ്രകടനം നടത്താനാവുമെന്നാണ് പ്രതീക്ഷയെന്നും ജഡേജ പറഞ്ഞു. ഒന്നാം ഇന്നിംഗ്‌സിൽ 587 റൺസിന് ഓൾ ഔട്ടായ ഇന്ത്യ രണ്ടാം ദിനം ഇംഗ്ലണ്ടിൻറെ മൂന്ന് വിക്കറ്റുകൾ 77 റൺസിനിടെ വീഴ്ത്തി ഇന്ത്യ മുൻതൂക്കം നേടിയിരുന്നു.
