തീർഥാടകർക്ക് സൗജന്യ ലോക്കർ സേവനം തുടരും: ഇരുഹറം കാര്യാലയം

മക്കയിലെ മസ്ജിദുൽ ഹറാമിലെത്തുന്ന തീർഥാടകർക്കായി 24 മണിക്കൂറും പ്രവർത്തിക്കുന്ന സൗജന്യ ലോക്കർ സേവനം തുടരുമെന്ന് ഇരുഹറം കാര്യാലയം അറിയിച്ചു. ആരാധനകൾ തടസ്സരഹിതമായി നിർവഹിക്കാൻ തീർഥാടകരെ സഹായിക്കുന്നതിനാണ് മസ്ജിദുൽ ഹറാമിന്റെ അകത്ത് പ്രത്യേകം സജ്ജീകരിച്ച കേന്ദ്രങ്ങളിലൂടെ ഈ സൗകര്യം ലഭ്യമാക്കുന്നത്. പ്രത്യേക പരിശീലനം ലഭിച്ച ജീവനക്കാരുടെ മേൽനോട്ടത്തിലായിരിക്കും ഈ സേവനം നൽകുക.

ഈ സംഭരണ കേന്ദ്രങ്ങൾ മസ്ജിദുൽ ഹറാമിലെ എല്ലാ പ്രവേശന കവാടങ്ങളിൽ നിന്നും എളുപ്പത്തിൽ എത്തിച്ചേരാൻ കഴിയുന്ന സ്ഥലങ്ങളിലാണ് സജ്ജീകരിച്ചിരിക്കുന്നത്. ടോയ്‌ലറ്റ് നമ്പർ 6-ന്റെ പിറകിലുള്ള പടിഞ്ഞാറൻ മുറ്റം, ടോയ്‌ലറ്റ് നമ്പർ 2-ന് അടുത്തുള്ള അജ്‌യാദ് സ്ട്രീറ്റ്, ഹറമിന്റെ കിഴക്ക് മുറ്റത്തെ ലൈബ്രറിക്ക് അടുത്ത് എന്നിവിടങ്ങളിലാണ് നിലവിൽ ഈ കേന്ദ്രങ്ങൾ പ്രവർത്തിക്കുന്നത്.

കൂടാതെ, ഗതാഗതം സുഗമമാക്കുന്നതിനും തീർഥാടകർക്ക് എളുപ്പത്തിൽ പ്രവേശനം ഉറപ്പാക്കുന്നതിനുമായി കിങ് അബ്ദുൽ അസീസ് ഗേറ്റ് നമ്പർ 1, കിങ് ഫഹദ് ഗേറ്റ് നമ്പർ 79 എന്നിവിടങ്ങളിൽ പിക്കപ്പ്, ഡ്രോപ്പ് ഓഫ് പോയിന്റുകളും സജ്ജമാക്കിയിട്ടുണ്ട്.