സൗദി അറേബ്യയുടെ പല ഭാഗങ്ങളിലും ഇന്ന് (ബുധനാഴ്ച) ശക്തമായ മഴയ്ക്കും ഇടിമിന്നലിനും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം മുന്നറിയിപ്പ് നൽകി. പെട്ടെന്നുള്ള വെള്ളപ്പൊക്കം, ആലിപ്പഴം വീഴ്ച, പൊടിപടലമുയർത്തുന്ന കാറ്റ് എന്നിവയ്ക്കും സാധ്യതയുണ്ട്. അഞ്ച് മേഖലകളിൽ മഴയും മൂടൽമഞ്ഞും പ്രതീക്ഷിക്കുന്നു.
കാലാവസ്ഥാ പ്രവചനം
ജിസാൻ, അസീർ: ഈ പ്രദേശങ്ങളുടെ ചില ഭാഗങ്ങളിൽ ഇടിമിന്നലോടുകൂടിയ മഴയുണ്ടാകും.
നജ്റാൻ, അൽബഹ, മക്ക: ഇവിടെ മിതമായതോ കനത്തതോ ആയ മഴയ്ക്ക് സാധ്യതയുണ്ട്. ഈ പ്രദേശങ്ങളിലെ ഉയർന്ന സ്ഥലങ്ങളിൽ മൂടൽമഞ്ഞ് രൂപപ്പെടാനും സാധ്യതയുണ്ട്.
കിഴക്കൻ, റിയാദ് മേഖലകൾ: ഈ മേഖലകളുടെ തെക്കൻ ഭാഗങ്ങളിൽ നേരിയതോ മിതമായതോ ആയ കാലാവസ്ഥയായിരിക്കും.
വിദ്യാഭ്യാസ സ്ഥാപനങ്ങൾക്ക് അവധി
അസീർ മേഖലയിൽ റെഡ് അലർട്ട് പ്രഖ്യാപിച്ചതിനെ തുടർന്ന് എല്ലാ സ്കൂളുകൾക്കും യൂണിവേഴ്സിറ്റികൾക്കും അവധി നൽകിയിട്ടുണ്ട്. ഓൺലൈൻ ക്ലാസുകളിലൂടെയാണ് പഠനം തുടരുന്നത്.
റെഡ് അലർട്ട് സോണിന്റെ പരിധിയിൽ വരുന്ന അബഹ, ഖമീസ് മുഷൈത്, അഹദ് റാഫിദ, അൽ മജർദ, ബർഖ്, റിജാൽ അൽമ, മുഹയിൽ, അൽ അരീൻ, അൽ നമാസ്, ബൽഖർൻ, തനുമ, അൽ ഹർജ, അൽ ഫർഷ, ശരത് അൽ ബർറാൻ, ദഹ അൽ ബർറാൻ എന്നിവിടങ്ങളിലെ സ്കൂളുകൾക്ക് ഇന്ന് അവധിയായിരിക്കുമെന്ന് അധികൃതർ അറിയിച്ചു.
നജ്റാൻ, അസീർ മേഖലകളിൽ കഴിഞ്ഞ ദിവസങ്ങളിൽ ലഭിച്ച കനത്ത മഴയെ തുടർന്ന് മലയോരങ്ങളിലെ താഴ്വരകളിലും പുഴകളിലും ശക്തമായ നീരൊഴുക്ക് അനുഭവപ്പെട്ടു. ഈ പ്രദേശങ്ങളിൽ നിന്നുള്ള ശക്തമായ മഴയുടെയും വെള്ളപ്പാച്ചിലിന്റെയും ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
