സംസ്ഥാനത്തെ സർവകലാശാലകളിൽ സ്ഥിരം വൈസ് ചാൻസലർമാരെ (വിസി) ഉടൻ നിയമിക്കണമെന്ന് സുപ്രീംകോടതി നിർദേശിച്ചു. ഇത് സംബന്ധിച്ച വിജ്ഞാപനം പുറത്തിറക്കാൻ ഗവർണർക്ക് കോടതി നിർദേശം നൽകിയിട്ടുണ്ട്. സ്ഥിരം വിസിമാരെ നിയമിക്കുന്നത് വരെ താൽക്കാലിക വിസിമാർക്ക് സ്ഥാനത്ത് തുടരാമെന്നും സുപ്രീംകോടതി വ്യക്തമാക്കി. താൽക്കാലിക വിസിമാരുടെ നിയമനം റദ്ദാക്കിയ ഹൈക്കോടതി വിധിക്കെതിരെ ഗവർണർ നൽകിയ ഹർജി പരിഗണിക്കവെയാണ് സുപ്രീംകോടതിയുടെ ഈ സുപ്രധാന ഉത്തരവ്.
ജസ്റ്റിസ് ജെ.ബി. പർദിവാല, ജസ്റ്റിസ് ആർ. മഹാദേവൻ എന്നിവരടങ്ങിയ ബെഞ്ചാണ് ഹർജി പരിഗണിച്ചത്. സർക്കാരും ഗവർണറും തമ്മിലുള്ള തർക്കത്തിൽ വിദ്യാർത്ഥികളാണ് കഷ്ടപ്പെടുന്നതെന്ന് കോടതി നിരീക്ഷിച്ചു. വൈസ് ചാൻസലർമാർ ഇല്ലാതെ സർവകലാശാലകൾ എങ്ങനെ മുന്നോട്ടു പോകുമെന്നും കോടതി ആരാഞ്ഞു. രാഷ്ട്രീയം മാറ്റിവെച്ച് വിദ്യാർത്ഥികളുടെ ക്ഷേമം ഉറപ്പാക്കാൻ ഗവർണറും സർക്കാരും ഒരുമിച്ച് പ്രവർത്തിക്കണമെന്നും സുപ്രീംകോടതി അഭിപ്രായപ്പെട്ടു.
കേരള ശാസ്ത്ര സാങ്കേതിക സർവകലാശാലയിലും ഡിജിറ്റൽ സർവകലാശാലയിലും സ്ഥിരം വിസിമാരെ നിയമിക്കുന്നതിനുള്ള നടപടികൾ ഉടൻ ആരംഭിക്കാനും കോടതി നിർദേശിച്ചു. പുതിയ വിസിമാരെ നിയമിക്കുന്നത് വരെ, ഹൈക്കോടതി ഉത്തരവിനെ തുടർന്ന് പുറത്തുപോയ രണ്ട് വിസിമാരെ താൽക്കാലിക വിസിമാരായി വീണ്ടും നിയമിക്കാനും സുപ്രീംകോടതി അനുമതി നൽകിയിട്ടുണ്ട്.
