സ്ക്രാം 440 ന്റെ ബുക്കിംഗുകളും വിൽപ്പനയും കമ്പനി വീണ്ടും ആരംഭിച്ചു. 2025 ജനുവരിയിലാണ് റോയൽ എൻഫീൽഡ് സ്ക്രാം 440 ഇന്ത്യൻ വിപണിയിൽ പുറത്തിറക്കിയത്. ഉപഭോക്താക്കൾ ഈ മോട്ടോർസൈക്കിൾ ബുക്ക് ചെയ്യാനും തുടങ്ങി. എന്നാൽ ചില മെക്കാനിക്കൽ പ്രശ്‌നങ്ങൾ മോട്ടോർസൈക്കിളിനെ ബാധിച്ചതായി റിപ്പോർട്ടുകൾ വന്നു. ഇതോടെ കുറച്ച് മാസങ്ങളായി ബുക്കിംഗ് താൽക്കാലികമായി നിർത്തിയിരുന്നു.
എഞ്ചിന്റെ മാഗ്നെറ്റോ കവറിൽ സ്ഥിതി ചെയ്യുന്നതും ബൈക്കിന്റെ ഇഗ്നിഷൻ സിസ്റ്റത്തിന്റെ ഭാഗമായതുമായ വുഡ്രഫ് കീയിൽ ആയിരുന്നു പ്രശ്‍നം കണ്ടെത്തിയത്. ഇക്കാരണത്താൽ ചിലപ്പോൾ ബൈക്ക് സ്റ്റാർട്ട് ചെയ്യാൻ സാധിച്ചില്ല. പ്രത്യേകിച്ച് എഞ്ചിൻ ഓഫ് ചെയ്ത ശേഷം റീസ്റ്റാർട്ട് ചെയ്യുമ്പോൾ ആണ് ഈ പ്രശ്‍നം കൂടുതലായും ബാധിച്ചത്. റോയൽ എൻഫീൽഡ് ഉടൻ തന്നെ പ്രശ്‍നം കണ്ടെത്തുകയും സാങ്കേതിക മെച്ചപ്പെടുത്തലുകൾ വരുത്തുന്നതിനായി വിൽപ്പന താൽക്കാലികമായി നിർത്തിവയ്‍ക്കുകയും ചെയ്തു. എന്നാൽ ഇപ്പോൾ ഈ മോട്ടോർസൈക്കളിലെ എല്ലാ സാങ്കേതിക പ്രശ്‌നങ്ങളും പരിഹരിച്ചതായും സ്ക്രാം 440 വീണ്ടും വിപണിയിൽ ലഭ്യമാക്കിയതായും കമ്പനി സ്ഥിരീകരിച്ചു. അതേസമയം ബൈക്കിന്റെ ലഭ്യത ഇപ്പോഴും പരിമിതമാണ്. പക്ഷേ ഡെലിവറി മികച്ചതാക്കാൻ റോയൽ എൻഫീൽഡ് പതുക്കെ ഉത്പാദനം വർധിപ്പിക്കുകയാണെന്നാണ് റിപ്പോർട്ടുകൾ.
ഈ മോട്ടോർസൈക്കിളിന്റെ പ്രത്യേകതകൾ പരിശോധിക്കുകയാണെങ്കിൽ സ്ക്രാം 411 നെ അനുസ്‍മരിപ്പിക്കുന്ന ഒരു ഡിസൈൻ ഇതിൽ ലഭിക്കുന്നു. ബൈക്കിന്റെ നിയോ-റെട്രോ ആകർഷണത്തിന് പ്രാധാന്യം നൽകുന്ന ഒരു വൃത്താകൃതിയിലുള്ള എൽഇഡി ഹെഡ്‌ലാമ്പ് ഇതിൽ പ്രദർശിപ്പിച്ചിരിക്കുന്നു. റോയൽ എൻഫീൽഡ് ലോഗോ അതിന്റെ വശത്ത് ലഭിക്കുന്ന ഒരു ബോക്‌സി ഇന്ധന ടാങ്ക് ഇത് കൂടുതൽ മെച്ചപ്പെടുത്തുന്നു. ചേസിസും സിംഗിൾ-പീസ് സീറ്റും ഉപയോഗിച്ച് മൊത്തത്തിലുള്ള ലുക്ക് പൂർത്തിയാക്കിയിരിക്കുന്നു. ഫോഴ്‌സ് വേരിയന്റിൽ അലോയ് വീലുകൾക്കുള്ള ഓപ്ഷനോടൊപ്പം 19/17 ഇഞ്ച് സ്‌പോക്ക് വീലുകളും റോയൽ എൻഫീൽഡ് നൽകുന്നു. ട്രെയിൽ ഗ്രീൻ, ട്രെയിൽ ബ്ലൂ, ഫോഴ്‌സ് ടീൽ, ഫോഴ്‌സ് ഗ്രേ, ഫോഴ്‌സ് ബ്ലൂ തുടങ്ങിയ കളർ ഓപ്ഷനുകളും ബൈക്കിന്റെ സൗന്ദര്യം കൂടുതൽ മെച്ചപ്പെടുത്തുന്നു.
ഹാഫ്-ഡ്യൂപ്ലെക്സ് സ്പ്ലിറ്റ് ക്രാഡിൽ ഫ്രെയിമിൽ നിർമ്മിച്ചിരിക്കുന്ന ഈ മോട്ടോർസൈക്കിളിൽ സസ്പെൻഷനായി 41 എംഎം ടെലിസ്കോപ്പിക് ഫ്രണ്ട് ഫോർക്കുകളും പിന്നിൽ മോണോ-ഷോക്ക്, ലിങ്കേജ് സിസ്റ്റം എന്നിവയും സജ്ജീകരിച്ചിരിക്കുന്നു. ഫ്രണ്ട് ബ്രേക്കിംഗ് സിസ്റ്റത്തിൽ രണ്ട് പിസ്റ്റൺ ഫ്ലോട്ടിംഗ് കാലിപ്പറുമായി ജോടിയാക്കിയ 300 എംഎം ഡിസ്‍ക് ഉപയോഗിക്കുന്നു. പിൻ ബ്രേക്കിംഗ് സിസ്റ്റത്തിൽ സിംഗിൾ-പിസ്റ്റൺ ഫ്ലോട്ടിംഗ് കാലിപ്പർ പിന്തുണയ്ക്കുന്ന 240 എംഎം ഡിസ്‍ക് ഉൾപ്പെടുന്നു. മെച്ചപ്പെടുത്തിയ സാങ്കേതികവിദ്യയുടെ ഭാഗമായി, മോട്ടോർസൈക്കിളിൽ ഒരു ഡിജിറ്റൽ-അനലോഗ് ഡിസ്പ്ലേയും ലഭിക്കുന്നു.
443 സിസി സിംഗിൾ സിലിണ്ടർ എയർ-കൂൾഡ് എഞ്ചിനാണ് റോയൽ എൻഫീൽഡ് സ്ക്രാം 440 ന് കരുത്തേകുന്നത്. ഈ എഞ്ചിൻ 6,250 rpm-ൽ 25 bhp പവറും 4,000 rpm-ൽ 34 Nm പരമാവധി ടോർക്കും ഉത്പാദിപ്പിക്കാൻ രൂപകൽപ്പന ചെയ്‌തിരിക്കുന്നു. ഉത്പാദിപ്പിക്കുന്ന പവർ വെറ്റ് മൾട്ടി-പ്ലേറ്റ് ക്ലച്ച് ഫീച്ചർ ചെയ്യുന്ന ആറ് സ്പീഡ് ട്രാൻസ്മിഷൻ വഴി പിൻ ചക്രത്തിലേക്ക് എത്തിക്കുന്നു. ഈ മോട്ടോർസൈക്കിളിന്റെ എക്സ്-ഷോറൂംവില 2.08 ലക്ഷം രൂപ മുതലാണ് ആരംഭിക്കുന്നത്.
