ജമ്മു കശ്മീരിൽ ഏറ്റുമുട്ടൽ; ജെയ്‌ഷെ മുഹമ്മദ് ഭീകരരെ വളഞ്ഞ് സൈന്യം

ജമ്മു കശ്മീരിലെ കിഷ്തവാർ ജില്ലയിൽ സുരക്ഷാസേനയും ഭീകരവാദികളും തമ്മിൽ ഏറ്റുമുട്ടുന്നു. ചാത്രെ മേഖലയിലെ സിംഹപോറ പ്രദേശത്താണ് വ്യാഴാഴ്ച രാവിലെ മുതൽ ഏറ്റുമുട്ടൽ നടക്കുന്നത്. രഹസ്യവിവരം ലഭിച്ചതിന്റെ അടിസ്ഥാനത്തിലാണ് പ്രദേശത്ത് തിരച്ചിൽ ആരംഭിച്ചത്.സൈന്യം, ജമ്മു കശ്മീർ പൊലീസ്, അർധസൈനികദളങ്ങൾ എന്നിവരുടെ സംയുക്ത നേതൃത്വത്തിലാണ് ഓപ്പറേഷൻ നടത്തുന്നത്

പ്രദേശം സുരക്ഷാസേന വളഞ്ഞതോടെ മൂന്ന് നാല് ഭീകരവാദികൾ ഇവിടെ കുടുങ്ങിക്കിടക്കുന്നുണ്ടെന്നാണ് വിവരം. ഇവർ ജെയ്‌ഷെ മുഹമ്മദ് അംഗങ്ങളാണെന്നാണ് സൂചന.ഒരാഴ്ച മുൻപ് പുൽവാമ ജില്ലയിലെ ത്രാൽ മേഖലയിലെ നാദിർ ഗ്രാമത്തിൽ സുരക്ഷാസേന നടത്തിയ വ്യത്യസ്ത ഭീകരവിരുദ്ധ നടപടികളിൽ മൂന്ന് ജെയ്‌ഷെ മുഹമ്മദ് ഭീകരവാദികളെ വധിച്ചിരുന്നു. ആസിഫ് അഹമ്മദ് ഷേഖ്, അമീർ നസീർ വാനി, യാവർ അഹമ്മദ് ഭട്ട് എന്നീ ഭീകരന്മാരാണ് അന്ന് കൊല്ലപ്പെട്ടത്