ഇന്ത്യ-കുവൈത്ത് മാധ്യമബന്ധം ശക്തമാക്കും

ഇന്ത്യയുമായുള്ള മാധ്യമ സഹകരണം വിപുലീകരിക്കാൻ കുവൈത്ത് ന്യൂസ് ഏജൻസിയും (കുന) കുവൈത്തിലെ ഇന്ത്യൻ അംബാസഡറും നടത്തിയ ചർച്ച ശ്രദ്ധേയം. കുനയുടെ ആക്ടിങ് ഡയറക്ടർ ജനറൽ മുഹമ്മദ് അൽ മന്നായിയും ഇന്ത്യൻ അംബാസഡർ ഡോ. ആദർശ് സൈ്വകയും തമ്മിലാണ് കൂടിക്കാഴ്ച നടന്നത്. ഇരു രാജ്യങ്ങളും തമ്മിലുള്ള സഹകരണം കൂടുതൽ മേഖലകളിലേക്കും പ്രത്യേകിച്ച് മാധ്യമ മേഖലയിലേക്ക് വ്യാപിപ്പിക്കേണ്ടതിന്റെ ആവശ്യകതയെ സംബന്ധിച്ചാണ് ചർച്ച ചെയ്തത്. വാർത്താ കൈമാറ്റം, മാധ്യമ പരിശീലനം, വൈദഗ്ദ്ധ്യബദൽ എന്നിവയെ സംബന്ധിച്ച സംയുക്ത പ്രവർത്തനങ്ങളുടെ പ്രാധാന്യം ഇരുപക്ഷവും പങ്കുവെച്ചു.

യോഗത്തിൽ, കുനയുടെ ആഗോള പ്രവർത്തനങ്ങൾ, പ്രത്യേകിച്ച് ഇന്ത്യയിലെ പ്രവർത്തനം, ലേഖകരുടെയും ബ്യൂറോകളുടെയും പ്രവർത്തനം എന്നിവയും വിശദമായി അവലോകനം ചെയ്തു. വ്യത്യസ്ത വിഷയങ്ങളിൽ കുന സ്വീകരിക്കുന്ന വസ്തുനിഷ്ഠ സമീപനത്തെ അംബാസഡർ പ്രത്യേകം പ്രശംസിച്ചു. കുവൈത്തിലെ പ്രാദേശിക വിഷയങ്ങൾ മുതൽ ആഗോള സംഭവവികാസങ്ങൾ വരെയുള്ള വിശ്വാസ്യതയുള്ള വാർത്താ റിപ്പോർട്ടിങ്ങിൽ കുനയുടെ നേതൃത്വത്തെ അംഗീകരിക്കുകയായിരുന്നു അംബാസഡർ. ഇരു രാജ്യങ്ങളുടെയും മാധ്യമസ്ഥാപനങ്ങൾ തമ്മിൽ ദീർഘകാല സഹകരണത്തിനായി വഴിയൊരുക്കാനുള്ള ചർച്ചയായിരുന്നു ഇതെന്ന് അധികൃതർ വ്യക്തമാക്കി.