എറണാകുളം ജില്ലാ പഞ്ചായത്ത് തിരഞ്ഞെടുപ്പിൽ യുഡിഎഫിന് വൻ തിരിച്ചടി. കടമക്കുടി ഡിവിഷനിലെ യുഡിഎഫ് സ്ഥാനാർത്ഥിയും നിലവിലെ ജില്ലാ പഞ്ചായത്ത് വൈസ് പ്രസിഡന്റുമായ എൽസി ജോർജിന്റെ നാമനിർദ്ദേശ പത്രിക തള്ളി. പത്രിക പൂരിപ്പിച്ചതിലെ പിഴവാണ് തള്ളാനുള്ള പ്രധാന കാരണം. ഇവിടെ യുഡിഎഫിന് ഡമ്മി സ്ഥാനാർത്ഥി പോലുമില്ലാത്തത് പ്രതിസന്ധി രൂക്ഷമാക്കി. നാമനിർദ്ദേശ പത്രികയിൽ മൂന്നു പേർ പിന്താങ്ങണം എന്നതും, പിന്താങ്ങുന്നവർ ബന്ധപ്പെട്ട ജില്ലാ പഞ്ചായത്ത് ഡിവിഷനിലെ വോട്ടർമാരായിരിക്കണം എന്നതുമാണ് വ്യവസ്ഥ. എന്നാൽ, എൽസി ജോർജിന്റെ പത്രികയിൽ പിന്താങ്ങിയവർ ഡിവിഷന് പുറത്തുള്ള വോട്ടർമാർ ആയിരുന്നു. ഇത് ചൂണ്ടിക്കാട്ടിയാണ് പത്രിക തള്ളിയത്.
ഇന്നലെ വരണാധികാരിയായ കളക്ടർക്ക് പത്രിക സമർപ്പിച്ച ഉടൻ തന്നെ ഈ പിഴവ് എൽസി ജോർജിന്റെ ശ്രദ്ധയിൽപ്പെടുത്തിയിരുന്നു. ഇതേത്തുടർന്ന്, ഡിവിഷന് അകത്ത് നിന്ന് പിന്താങ്ങുന്നവരെ കണ്ടെത്തി സ്ഥാനാർത്ഥി ഉടൻ തന്നെ പുതിയ പത്രിക തയ്യാറാക്കി. പുതിയ പത്രിക സമർപ്പിക്കാനായി ഇന്നലെ ഉച്ചയ്ക്ക് 2.30-ഓടെ കളക്ടറുടെ ചേംബറിന് പുറത്തെത്തിയെങ്കിലും, അവിടെയുണ്ടായിരുന്ന പോലീസ് ഉദ്യോഗസ്ഥൻ അകത്തേക്ക് കയറാൻ അനുവദിച്ചില്ലെന്ന് യുഡിഎഫ് നേതാക്കൾ ആരോപിക്കുന്നു.
തുടർന്ന് വലിയ ബഹളമുണ്ടാക്കിയ ശേഷം കളക്ടറുടെ ചേംബറിലേക്ക് കയറിയപ്പോൾ സമയം 2.57 ആയിരുന്നു. പത്രിക സമർപ്പിക്കാനുള്ള സമയപരിധി മൂന്ന് മണിയായിരുന്നു. പത്രിക സമർപ്പിക്കാൻ സമയം ഉണ്ടായിട്ടും കളക്ടർ ഫോൺ സംഭാഷണത്തിലായിരുന്നുവെന്നും, സംഭാഷണം കഴിഞ്ഞ് അദ്ദേഹം മടങ്ങിവന്നപ്പോൾ സമയം 3.15 ആയെന്നും യുഡിഎഫ് നേതാക്കൾ ആരോപിച്ചു. ഇതോടെ സമയപരിധി കഴിഞ്ഞതിനാൽ പത്രിക സ്വീകരിക്കാൻ കഴിയില്ലെന്ന് കളക്ടർ നിലപാടെടുക്കുകയായിരുന്നു. ചേംബറിന് പുറത്തുണ്ടായിരുന്ന പോലീസുകാരൻ ഉണ്ടാക്കിയ അനാവശ്യ പ്രശ്നമാണ് തിരുത്തിയ പത്രിക സമർപ്പിക്കാൻ കഴിയാതെ പോയതിന് കാരണമെന്നും നേതാക്കൾ ആരോപിക്കുന്നു.
കടമക്കുടി അനായാസം വിജയിക്കാവുന്ന ഡിവിഷനായാണ് യുഡിഎഫ് കണ്ടിരുന്നത്. ഈ വിഷയങ്ങൾ ചൂണ്ടിക്കാട്ടി കോടതിയെ സമീപിക്കുന്നതിനെക്കുറിച്ച് യുഡിഎഫ് ആലോചിക്കുന്നുണ്ട്. യുഡിഎഫ് സ്ഥാനാർത്ഥിക്ക് അനുകൂലമായ വിധി കോടതിയിൽ നിന്ന് വന്നില്ലെങ്കിൽ കടമക്കുടിയിൽ മത്സരം എൽഡിഎഫും ബിജെപിയും തമ്മിലായിരിക്കും.
Discover more from Radio Keralam 1476 AM News
Subscribe to get the latest posts sent to your email.
