കാസർഗോഡ് പ്ലൈവുഡ് ഫാക്ടറിയിൽ പൊട്ടിത്തെറി: ഒരാൾ മരിച്ചു, ഇരുപതോളം പേർക്ക് പരിക്ക്

കാസർഗോഡ് പ്ലൈവുഡ് ഫാക്ടറിയിൽ പൊട്ടിത്തെറി. അനന്തപുരത്ത് പ്രവർത്തിക്കുന്ന ഡെക്കോർ പാനൽ ഇൻഡസ്ട്രീസ് എന്ന ഫാക്ടറിയിലാണ് പൊട്ടിത്തെറി ഉണ്ടായത്.
അപകടത്തിൽ ഒരാൾ മരണപ്പെടുകയും ഇരുപതോളം പേർക്ക് പരിക്കേൽക്കുകയും ചെയ്തു.

തിങ്കൾ രാത്രി ഏഴോടെയാണ് സംഭവം. വലിയ ശബ്ദംകേട്ട് പരിസരത്തെ വീടുകളിലെ ആളുകൾ ഇറങ്ങിയോടി. പരിസരപ്രദേശത്തുള്ള വീടുകളുടെ ജനൽചില്ലുകളും തകർന്നു. ഫാക്ടറിയിലെ ബോയിലർ പൊട്ടിത്തെറിച്ചതാണ് അപകട കാരണമെന്നാണ് പ്രാഥമിക നിഗമനം. മുന്നൂറോളം തൊഴിലാളികളാണ് ഇവിടെ ജോലിചെയ്യുന്നത്. കാസർകോട്, ഉപ്പള സ്റ്റേഷനുകളിൽ നിന്നെത്തിയ അഗ്‌നിരക്ഷാ സേനയും പൊലീസും നാട്ടുകാരും ചേർന്ന് തീയണച്ചു.