സ്വിറ്റ്സർലൻഡിലെ പ്രശസ്തമായ ക്രാൻസ് മൊണ്ടാനയിലെ സ്കൈ ബാറിൽ പുതുവത്സരാഘോഷങ്ങൾക്കിടെയുണ്ടായ വൻ സ്ഫോടനത്തിൽ നിരവധി പേർ കൊല്ലപ്പെട്ടു. വ്യാഴാഴ്ച പുലർച്ചെ 1.30-ഓടെ ‘ലെ കോൺസ്റ്റലേഷൻ’ എന്ന ബാറിലാണ് നാടിനെ നടുക്കിയ ദുരന്തമുണ്ടായത്. സംഗീത പരിപാടിക്കിടെയുണ്ടായ വെടിക്കെട്ടാണ് സ്ഫോടനത്തിന് കാരണമായതെന്ന് സ്വിസ് വാർത്താ ഏജൻസിയായ ബ്ലിക്ക് റിപ്പോർട്ട് ചെയ്തു. അപകടസമയത്ത് നൂറോളം പേർ ബാറിലുണ്ടായിരുന്നു. മരിച്ചവരിൽ ഭൂരിഭാഗവും അവധിക്കാലം ആഘോഷിക്കാനെത്തിയ വിനോദസഞ്ചാരികളാണ്.
സ്ഫോടനത്തെത്തുടർന്ന് ക്രാൻസ് മൊണ്ടാന പ്രദേശം നിരോധിത മേഖലയായി പ്രഖ്യാപിക്കുകയും പൂർണ്ണമായും പോലീസ് നിയന്ത്രണത്തിലാക്കുകയും ചെയ്തു. രക്ഷാപ്രവർത്തനത്തിനായി നിരവധി ഹെലികോപ്റ്ററുകളും ഫയർ സർവീസും സംഭവസ്ഥലത്ത് വിന്യസിച്ചിട്ടുണ്ട്. പരിക്കേറ്റവരെ ഉടൻ തന്നെ ആശുപത്രികളിലേക്ക് മാറ്റി. ദുരന്തബാധിതരുടെ ബന്ധുക്കൾക്കായി പോലീസ് പ്രത്യേക ഹോട്ട്ലൈൻ സേവനവും ആരംഭിച്ചിട്ടുണ്ട്.
സ്വിസ് തലസ്ഥാനമായ ബേണിൽ നിന്ന് രണ്ട് മണിക്കൂർ അകലെ വലൈസ് മേഖലയിൽ സ്ഥിതി ചെയ്യുന്ന ഈ ആഡംബര സ്കീ റിസോർട്ട് നഗരം വിദേശ വിനോദസഞ്ചാരികളുടെ പ്രധാന കേന്ദ്രമാണ്. സംഭവത്തിൽ അധികൃതർ വിശദമായ അന്വേഷണം ആരംഭിച്ചു.
Discover more from Radio Keralam 1476 AM News
Subscribe to get the latest posts sent to your email.
