ജൂൺ 13 മുതൽ ഇൻഡിഗോയ്ക്ക് അബുദാബിയിൽ നിന്ന് ഇന്ത്യയിലേക്ക് പുതിയ സർവീസ്

ഇൻഡിഗോ എയർലൈൻസ് അബുദാബിയിൽ നിന്നും ഇന്ത്യയിലേക്ക് ഒരു പുതിയ വിമാന സർവീസ് കൂടി പ്രഖ്യാപിച്ചു. ജൂൺ 13 മുതൽ മധുരയിലേക്ക് നേരിട്ടുള്ള ഒരു സർവീസ് കൂടി ആരംഭിക്കുന്നതെന്ന് കമ്പനി അധികൃതർ അറിയിച്ചു. ഇൻഡിഗോ അബുദാബിയുമായി നേരിട്ട് ബന്ധിപ്പിക്കുന്ന 16-ാമത്തെ ഇന്ത്യൻ നഗരമാണ് മധുര.

ഇന്ത്യയിലെ ഭുവനേശ്വർ, വിശാഖപട്ടണം എന്നിവിടങ്ങളിൽ നിന്ന് അബുദാബിയിലേക്ക് നേരിട്ടുള്ള വിമാന സർവീസുകൾ ഇൻഡിഗോ ആരംഭിച്ചിരുന്നു. ഇതിനു പിന്നാലെയാണ് മധുരയിലേക്കും സർവീസ് തുടങ്ങുന്നതിന്റെ പ്രഖ്യാപനം എയർലൈൻസ് അധികൃതർ നടത്തിയത്. ആഴ്ചയിൽ മൂന്ന് തവണയായിരിക്കും അബുദാബി-മധുര സർവീസുകൾ ഉണ്ടാകുന്നത്. അവധിക്കാല തിരക്കും ടിക്കറ്റ് നിരക്ക് വർധനയും കണക്കിലെടുത്ത് പുതിയ സർവീസ് ഇന്ത്യക്കാരായ യാത്രക്കാരെ സംബന്ധിച്ച് ആശ്വാസകരമായിരിക്കുമെന്നാണ് എയർലൈൻസ് കമ്പനി അധികൃതർ അറിയിച്ചത്. കഴിഞ്ഞ ആഴ്ച ഫുജൈറ-മുംബൈ, ഫുജൈറ-കണ്ണൂർ നേരിട്ടുള്ള വിമാന സർവീസുകൾ ഇൻഡിഗോ എയർലൈൻസ് ആരംഭിച്ചിരുന്നു.