കുവൈത്തിലേക്കുള്ള പ്രവേശന നടപടികൾ ലളിതവും വേഗത്തിലും ആക്കുന്നതിന്റെ ഭാഗമായി കുവൈത്ത് പുതിയ ഇലക്ട്രോണിക് വിസ (ഇ-വിസ) സംവിധാനം ആരംഭിച്ചു. ടൂറിസ്റ്റ് വിസ, ഫാമിലി വിസിറ്റ് വിസ, ബിസിനസ് വിസ, ഒഫീഷ്യൽ വിസ എന്നിങ്ങനെ നാല് തരം വിസിറ്റ് വിസകൾക്കാണ് പുതിയ സേവനം ലഭ്യമാകുക. യാത്രക്കാർക്കും താമസക്കാർക്കും പ്രവേശന നടപടിക്രമങ്ങൾ ലളിതമാക്കാനും വേഗത്തിലാക്കാനും ഇത് സഹായിക്കും. ടൂറിസം, വ്യാപാരം, നിക്ഷേപം, അന്താരാഷ്ട്ര സഹകരണം എന്നിവയുടെ പ്രാദേശിക കേന്ദ്രമായി മാറാനുള്ള കുവൈത്തിന്റെ ശ്രമങ്ങളിൽ ഒരു പ്രധാന നാഴികക്കല്ലാണ് ഈ നീക്കം.
കുവൈത്തിന്റെ സാംസ്‌ക്കാരിക പൈതൃകം, ആധുനിക ആകർഷണങ്ങൾ, മനോഹരമായ തീരപ്രദേശങ്ങൾ എന്നിവ കാണാൻ ആഗ്രഹിക്കുന്നവർക്കായി രൂപകൽപ്പന ചെയ്ത വിസയാണ് ടൂറിസ്റ്റ് വിസ. 90 ദിവസം വരെയാണ് ഇതിന്റെ കാലാവധി.കുവൈത്തിലെ താമസക്കാർക്ക് തങ്ങളുടെ ബന്ധുക്കളെ രാജ്യത്തേക്ക് ക്ഷണിക്കാൻ സഹായകമാവുന്ന വിസയാണ് കുടുംബ സന്ദർശന വിസ. 30 ദിവസമാണ് ഈ വിസയുടെ കാലാവധി.ബിസിനസ് വിസ ,വിദേശ കമ്പനികളുടെയും സ്ഥാപനങ്ങളുടെയും പ്രതിനിധികൾക്ക് യോഗങ്ങൾ, കോൺഫറൻസുകൾ അല്ലെങ്കിൽ മറ്റ് പ്രൊഫഷണൽ ആവശ്യങ്ങൾക്കായി കുവൈത്ത് സന്ദർശിക്കാൻ സഹായകമാവും. 30 ദിവസമാണ് ഈ വിസയുടെ കാലാവധി.സർക്കാർ പ്രതിനിധി സംഘങ്ങൾക്കും നയതന്ത്ര ദൗത്യങ്ങളിലുള്ളവർക്കും ഔദ്യോഗിക ആവശ്യങ്ങൾക്കായി ഔദ്യോഗിക വിസ ലഭിക്കും.
