ഇന്തൊനേഷ്യയിൽ ആഞ്ഞടിച്ച തിരമാലയിൽ പെട്ട് യുവാവിനെ കാണാതെയായി; ആറാം ദിവസവും തിരച്ചിൽ തുടരുന്നു

​ഇന്തൊനേഷ്യയിലെ ബീച്ചിൽ വച്ച് ഫോട്ടോയ്ക്ക് പോസ് ചെയ്യുകയായിരുന്ന 20 കാരൻ ആഞ്ഞടിച്ച തിരമാലയിൽ പെട്ട് കാണാതായി. ഒക്‌ടോബർ 13 -ന് കെഡുങ് തുമ്പാങ് ബീച്ചിൽ വച്ചാണ് ഇന്തോനേഷ്യയിലെ മെഡനിൽ നിന്നുള്ള റോണി ജോസുവ സിമൻജുൻ്റക്കിനെ കാണാതായത്. സംഭവത്തിന്റെ ദ‍‍ൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുകയാണ്.

യുവാവിനെ കണ്ടെത്തുന്നതിനായി സെർച്ച് ആൻഡ് റെസ്ക്യൂ ടീമുകളെ വിന്യസിച്ചിട്ടുണ്ടെങ്കിലും അപകടകരമായ രീതിയിൽ തിരമാലകൾ 2 മുതൽ 4 മീറ്റർ വരെ ഉയരത്തിലാണ് ആഞ്ഞടിക്കുന്നത്. യുവാവിനായി ഏഴ് ദിവസം വരെ തിരച്ചിൽ തുടരാനായിരുന്നു അധികൃതർ പദ്ധതിയിട്ടിരുന്നത്. എന്നാൽ, ഒക്ടോബർ 20 ഞായറാഴ്‌ചയ്‌ക്കുള്ളിൽ റോണിയെ കണ്ടെത്താനായില്ലെങ്കിൽ, രക്ഷാപ്രവർത്തനം നിർത്തിവച്ചേക്കാം എന്നാണ് വിവരം.