തൈറോയ്ഡ് രോ​ഗമുണ്ടോ? ഈ ഭക്ഷണങ്ങൾ കഴിക്കുമ്പോൾ ശ്രദ്ധിക്കുക

ശരീരത്തിൻ്റെ വിവിധ പ്രവർത്തനങ്ങളെ നിയന്ത്രിക്കുന്ന ഹോർമോണുകളായ തൈറോക്‌സിൻ ($T_4$), ട്രൈയോഡോ തൈറോണിൻ ($T_3$) എന്നിവ ഉത്പാദിപ്പിക്കുന്ന ഗ്രന്ഥിയാണ് തൈറോയ്ഡ്. ഈ ഹോർമോണുകളുടെ അസന്തുലനം ഹൈപ്പോതൈറോയ്ഡിസം, ഹൈപ്പർതൈറോയ്ഡിസം തുടങ്ങിയ നിരവധി ആരോഗ്യപ്രശ്നങ്ങൾക്ക് കാരണമാകാറുണ്ട്. ഇന്ത്യയിൽ എല്ലാ പ്രായക്കാരിലും തൈറോയ്ഡ് രോഗങ്ങൾ ഇന്ന് സർവസാധാരണമാണ്. ഭക്ഷണശീലങ്ങൾ, മാനസിക സമ്മർദ്ദം, പാരമ്പര്യം എന്നിവയെല്ലാം ഈ രോഗങ്ങൾ വർദ്ധിക്കാൻ കാരണമാകുന്നു. ഇന്ത്യൻ ജനസംഖ്യയുടെ 11 ശതമാനം പേരെയും ഹൈപ്പോതൈറോയ്ഡിസം ബാധിക്കുന്നതായി ലാൻസെറ്റ് ജേണലിൽ പ്രസിദ്ധീകരിച്ച ഒരു പഠനം സൂചിപ്പിക്കുന്നു.

ചില തരം ഭക്ഷണങ്ങൾ ഒഴിവാക്കുകയോ പരിമിതപ്പെടുത്തുകയോ ചെയ്യുന്നത് ഹൈപ്പോതൈറോയ്ഡിസത്തിൻ്റെ രൂക്ഷത കുറയ്ക്കാൻ സഹായിക്കും.

സംസ്കരിച്ച ഭക്ഷണങ്ങൾ

പ്രോസസ്ഡ് അല്ലെങ്കിൽ അൾട്രാ പ്രോസസ്ഡ് ഭക്ഷണങ്ങൾ ഹൈപ്പോതൈറോയ്ഡിസമുള്ളവർ ഒഴിവാക്കുന്നതാണ് നല്ലത്. പാക്കറ്റിലാക്കിയ പൊട്ടറ്റോ ചിപ്‌സ് പോലുള്ള സ്‌നാക്കുകൾ, സോഡ, മധുരപാനീയങ്ങൾ, മധുരം ചേർന്ന ബ്രേക്ക്‌ഫാസ്റ്റ് സിറിയലുകൾ, പ്രിസർവേറ്റീവുകൾ ചേർത്ത ഫ്‌ളേവർഡ് ഗ്രനോള ബാറുകൾ തുടങ്ങിയവയെല്ലാം അൾട്രാ പ്രോസസ്ഡ് ഭക്ഷണങ്ങളിൽ ഉൾപ്പെടുന്നു.

ഗ്ലൂട്ടൻ

ഗോതമ്പ്, ബാർലി പോലുള്ള ധാന്യങ്ങളിൽ കാണപ്പെടുന്ന ഒരു പ്രോട്ടീനാണ് ഗ്ലൂട്ടൻ. സീലിയാക് രോഗമുള്ളവർ ഗ്ലൂട്ടൻ അടങ്ങിയ ഭക്ഷണം കഴിച്ചാൽ, ഓട്ടോഇമ്മ്യൂൺ പ്രതികരണം ട്രിഗർ ചെയ്യപ്പെടുകയും ദഹനനാളത്തിന് ക്ഷതമുണ്ടാകുകയും ചെയ്യാം. ഇത് പോഷകങ്ങൾ വലിച്ചെടുക്കാനുള്ള ശരീരത്തിൻ്റെ കഴിവിനെ ബാധിക്കുകയും പോഷണക്കുറവിലേക്ക് നയിക്കുകയും, തൽഫലമായി ഹൈപ്പോതൈറോയ്ഡിസം വഷളാക്കുകയും ചെയ്യാം.

ഗോയിട്രോജനുകൾ

സോയ ഉത്പന്നങ്ങളിലും കാബേജ്, ബ്രസൽസ് സ്പ്രൗട്ട്സ് പോലുള്ള ക്രൂസിഫെറസ് പച്ചക്കറികളിലും കാണപ്പെടുന്നവയാണ് ഗോയിട്രോജനുകൾ. ഇവ തൈറോയ്ഡ് ഹോർമോൺ ഉത്പാദനത്തെ ബാധിക്കാമെന്ന് ചില ഗവേഷണങ്ങൾ സൂചന നൽകുന്നു. കാബേജ്, റഷ്യൻ കെയ്‌ൽ, സോയ, ബ്രസൽസ് സ്പ്രൗട്ട്സ്, പേൾ മില്ലറ്റ് എന്നിവയെല്ലാം ഗോയിട്രോജനുകൾ അടങ്ങിയ ഭക്ഷണങ്ങളാണ്. എന്നാൽ ബ്രോക്കോളിയിൽ ഗോയിട്രോജൻ്റെ അളവ് കുറവാണ്.