പ്രമേഹ രോഗികൾ ചോറ് ഒഴിവാക്കേണ്ടതില്ല; ഇങ്ങനെ കഴിക്കാം

പ്രമേഹമുള്ളവർ ചോറ് പൂർണ്ണമായി ഒഴിവാക്കേണ്ടതില്ല. അരി പ്രത്യേക രീതിയിൽ വേവിച്ചു കഴിക്കുന്നത് രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കുമെന്നാണ് പുതിയ പഠനങ്ങൾ സൂചിപ്പിക്കുന്നത്. ന്യൂട്രീഷൻ ആൻഡ് ഡയബറ്റിസ് ജേണലിൽ പ്രസിദ്ധീകരിച്ച പഠനത്തിലാണ് ഈ കണ്ടെത്തൽ.

സാധാരണയായി ചോറ് കഴിക്കുന്നതിനേക്കാൾ, ഒരു ദിവസം മുൻപ് വേവിച്ച ചോറ്, 24 മണിക്കൂറിന് ശേഷം തണുപ്പിച്ച്, വീണ്ടും ചൂടാക്കി കഴിക്കുമ്പോൾ പ്രമേഹരോഗികളിൽ രക്തത്തിലെ ഗ്ലൂക്കോസിന്റെ അളവ് കുറയുന്നു.

സംഭവിക്കുന്നത് എന്ത്?

• അന്നജത്തിന് മാറ്റം: ചോറ് തണുപ്പിക്കുമ്പോൾ അതിലെ അന്നജ തന്മാത്രകൾ (പ്രത്യേകിച്ച് അമിലോസ്, അമിലോപെക്റ്റിൻ) പുനഃക്രമീകരിച്ച് ‘പ്രതിരോധശേഷിയുള്ള അന്നജം’ (Resistant Starch) ആയി മാറുന്നു.
• നാരുകൾ പോലെ: ഈ പ്രതിരോധശേഷിയുള്ള അന്നജം ദഹനവ്യവസ്ഥയിൽ നാരുകൾ പോലെയാണ് പ്രവർത്തിക്കുന്നത്.
• ദഹനം പതുക്കെ: ഇത് കാർബോഹൈഡ്രേറ്റിന്റെ വിഘടന പ്രക്രിയ പതുക്കെയാക്കുകയും, രക്തത്തിലേക്ക് ഗ്ലൂക്കോസ് കലരുന്നത് സാവധാനത്തിലാക്കുകയും ചെയ്യുന്നു.

പഠനത്തിൽ പങ്കെടുത്തവരിൽ, തണുപ്പിച്ച് വീണ്ടും ചൂടാക്കിയ ചോറ് കഴിച്ചപ്പോൾ രക്തത്തിലെ ഗ്ലൂക്കോസിന്റെ അളവ് കുറഞ്ഞതായി ഗവേഷകർ കണ്ടെത്തി.

പ്രധാന മുന്നറിയിപ്പ്!

ഈ രീതി പ്രമേഹരോഗികൾക്ക് ഗുണകരമാണെങ്കിലും, ടൈപ്പ് 1 പ്രമേഹമുള്ള മൂന്ന് പേരിൽ ഗ്ലൂക്കോസിന്റെ അളവ് വളരെ കുറഞ്ഞ് ‘ഹൈപ്പോഗ്ലൈസീമിയ’ എന്ന അവസ്ഥയ്ക്ക് കാരണമായതായും പഠനത്തിൽ കണ്ടെത്തി.ഈ രീതി പതിവാക്കുന്നത് ഇൻസുലിന്റെ അളവിൽ മാറ്റങ്ങൾ വരുത്താൻ സാധ്യതയുണ്ട്. പ്രമേഹരോഗികൾ ഡോക്ടറുടെ നിർദ്ദേശപ്രകാരവും മേൽനോട്ടത്തിലും മാത്രമേ ഈ ഭക്ഷണക്രമം പിന്തുടരാൻ പാടുള്ളൂ.