വെറുതെയിരിക്കുമ്പോൾ മധുരം കഴിക്കാൻ തോന്നാറുണ്ടോ? വിറ്റാമിനുകളുടെ കുറവാകാം

വെറുതെയിരിക്കുമ്പോൾ പതിവായി മധുരം കഴിക്കാൻ തോന്നാറുണ്ടോ? എങ്കിൽ ഇതിനെ സ്വാഭാവികമായി കണ്ട് അവഗണിക്കരുതെന്ന് വിദഗ്ധർ മുന്നറിയിപ്പ് നൽകുന്നു. ശരീരത്തിലെ ചില പ്രധാന പോഷകങ്ങളുടെ അഭാവത്തിന്റെ സൂചനയാകാം ഈ മധുരത്തോടുള്ള ആസക്തി.

പ്രധാനമായും, ബി വിറ്റാമിനുകളുടെ കുറവ് ഇത്തരത്തിൽ മധുരത്തോടുള്ള കൊതിക്ക് കാരണമാകാറുണ്ട്. വിറ്റാമിൻ ബി1 (തയാമിൻ), വിറ്റാമിൻ ബി2 (റൈബോഫ്ലേവിൻ), വിറ്റാമിൻ ബി3 (നിയാസിൻ), വിറ്റാമിൻ ബി12, വിറ്റാമിൻ ബി5 (പാന്റോതെനിക് ആസിഡ്) എന്നിവയുടെ അഭാവം മധുരത്തോട് ആസക്തി വർദ്ധിപ്പിക്കും. ഈ ബി വിറ്റാമിനുകൾ ശരീരത്തിൽ ഊർജ്ജം നിലനിർത്താൻ സഹായിക്കുന്നവയാണ്.

കൂടാതെ, രക്തത്തിലെ ക്രോമിയത്തിന്റെ അളവ് കുറയുന്നതും മധുരത്തോടുള്ള ഈ ആസക്തിക്ക് കാരണമാവാം. ഇൻസുലിൻ പ്രവർത്തനം മെച്ചപ്പെടുത്തി രക്തത്തിലെ പഞ്ചസാരയുടെ അളവ് നിയന്ത്രിക്കാൻ ക്രോമിയം സഹായിക്കുന്നു. ബ്രോക്കോളി, മുന്തിരി, ഉരുളക്കിഴങ്ങ്, വെളുത്തുള്ളി, ലീൻ മാംസ്യം എന്നിവയിൽ ക്രോമിയം ധാരാളമായി അടങ്ങിയിട്ടുണ്ട്. ഫോസ്ഫറസ്, സൾഫർ തുടങ്ങിയ ധാതുക്കളുടെ കുറവും മധുരത്തോടുള്ള ആസക്തിക്ക് വഴിയൊരുക്കാം.