വാദി ഖാഫിഫ അണക്കെട്ട് ഭാഗികമായി തുറന്നു

ഇബ്ര വിലായത്തിലെ വാദി ഖാഫിഫ അണക്കെട്ട് ഭാഗികമായി തുറന്നതായി വടക്കൻ ശർഖിയ ഗവർണറേറ്റിലെ കൃഷി, ജലവിഭവ ഡയറക്ടറേറ്റ് ജനറൽ അറിയിച്ചു. മേഖലയിൽ സമീപകാലത്തുണ്ടായ മഴയെതുടർന്ന് വാദികളിൽനിന്ന് ഗണ്യമായ രീതിയിൽ വെള്ളം ഒഴുകുന്നത് കണക്കിലെടുത്താണ് ഡാം തുറന്നത്. ഇബ്ര, ദിമ തുടങ്ങിയ പ്രദേശങ്ങളിൽ കഴിഞ്ഞ രണ്ട് ദിവസമായി യഥാക്രമം 16 മില്ലിമീറ്ററും അഞ്ച് മില്ലിമീറ്ററും മഴയാണ് ലഭിച്ചത്. ഇബ്രയിലെ ഖാഫിഫ, അൽ ജർവാല എന്നിവയുൾപ്പെടെ നിരവധി വാദികളിൽനിന്നുള്ള വെള്ളം ഡാമിലേക്ക് ഒഴുകിയെത്തുകയായിരുന്നു.