അൽ വജാജ അതിർത്തിയിൽ യു.എ.ഇ ദേശീയദിനം ആഘോഷിച്ചു

ഒമാനും യു.എ.ഇയും തമ്മിലുള്ള ആഴമേറിയ സൗഹൃദത്തിന്റെയും സാഹോദര്യത്തിന്റെയും നേർക്കാഴ്ചയ്ക്കാണ് അൽ വജാജ അതിർത്തി വേദിയായത്. യു.എ.ഇയുടെ 54-ാമത് ദേശീയ ദിനം ഒമാൻ റോയൽ പോലീസ് അതിവിപുലമായി ആഘോഷിച്ചപ്പോൾ അത് ഇരുരാജ്യങ്ങളും തമ്മിലുള്ള ആത്മബന്ധത്തിന്റെ പ്രഖ്യാപനമായി മാറി. ഡിസംബർ രണ്ടിന് നടന്ന ആഘോഷപരിപാടികളിൽ പങ്കെടുക്കാൻ ദുബായ് ജി.ഡി.ആർ.എഫ്.എ യുടെ ഉന്നത ഉദ്യോഗസ്ഥർ അതിഥികളായി പങ്കെടുത്തു. ജനറൽ ഡയറക്ടറേറ്റിലെ ഫോറിനേഴ്‌സ് ഫോളോ-അപ്പ് അസിസ്റ്റന്റ് ഡയറക്ടർ മേജർ ജനറൽ ഡോ. അലി ബിൻ അജെഫ്‌ അൽ സാബിയുടെ നേതൃത്വത്തിലുള്ള ഉന്നതതല സംഘമാണ് അതിർത്തിയിലെത്തിയത്. നോർത്ത് അൽ ബാത്തിന ഗവർണറേറ്റ് കമാൻഡർ ബ്രിഗേഡിയർ അബ്ദുള്ള അൽ ഫാർസിയുടെ നേതൃത്വത്തിൽ ഒമാൻ റോയൽ പോലീസ് സംഘത്തെ ഊഷ്മളമായി സ്വീകരിച്ചു.

ഒമാൻ ഉദ്യോഗസ്ഥരോടൊപ്പം ചേർന്ന് യു.എ.ഇ പ്രതിനിധികൾ ആഘോഷങ്ങളിൽ പങ്കുചേർന്ന നിമിഷങ്ങൾ പരസ്പര ബഹുമാനത്തിന്റെയും സഹകരണത്തിന്റെയും ഉദാത്ത മാതൃകയായി.പൈതൃകത്തിന്റെ താളലയം ആഘോഷങ്ങൾക്ക് മാറ്റുകൂട്ടിയത് ഇരുരാജ്യങ്ങളുടെയും പൈതൃകവും സംസ്കാരവും വിളിച്ചോതുന്ന നാടൻ കലാരൂപങ്ങളുടെ അവതരണമായിരുന്നു. ഒമാന്റെയും യു.എ.ഇയുടെയും പൗരാണിക ചരിത്രത്തെയും ഗോത്ര പാരമ്പര്യങ്ങളെയും അനുസ്മരിപ്പിക്കുന്ന സംഗീതവും നൃത്തചുവടുകളും ചടങ്ങിന് മിഴിവേകി. അതിർത്തി കടന്നെത്തിയ യാത്രക്കാർക്കും സന്ദർശകർക്കും ഈ കലാവിരുന്ന് കൗതുകകരവും ഹൃദയസ്പർശിയായതുമായ അനുഭവമായി മാറി.അലങ്കാരങ്ങളും മധുരവും
യു.എ.ഇ ദേശീയ പതാകയുടെ വർണ്ണങ്ങളാൽ അലങ്കരിച്ച അതിർത്തിയിൽ, യാത്രക്കാർക്ക് മധുരപലഹാരങ്ങൾ വിതരണം ചെയ്തും ആശംസകൾ കൈമാറിയും ഉദ്യോഗസ്ഥർ സന്തോഷം പങ്കിട്ടു.

ഇതൊരു ദേശീയദിനാഘോഷം എന്നതിലുപരി, ഈ ആഘോഷ ചടങ്ങ് ഒമാനും യു.എ.ഇയും തമ്മിലുള്ള ദൃഢമായ ബന്ധത്തിന്റെ പ്രതീകമാണെന്ന് ജി.ഡി.ആർ.എഫ്.എ അധികൃതർ വ്യക്തമാക്കി.ഇരുരാജ്യങ്ങളിലെയും ഭരണാധികാരികളും ജനങ്ങളും തമ്മിലുള്ള സാഹോദര്യത്തെ പ്രശംസിച്ചുകൊണ്ട് ഉദ്യോഗസ്ഥർ സംസാരിച്ചു. ദേശീയ ദിനങ്ങൾ പരസ്പരം പങ്കുവെച്ചുകൊണ്ട്, അയൽരാജ്യങ്ങൾ തമ്മിലുള്ള ബന്ധം എത്രത്തോളം ഊഷ്മളമായിരിക്കണം എന്ന് അടയാളപ്പെടുത്തുകയായിരുന്നു അൽ വജാജയിലെ ഈ ഒത്തുചേരൽ. ഒമാൻ ദേശീയ ദിന ആഘോഷവും ദുബായ് അധികാരികൾ ഹത്ത ബോർഡറിൽ ഇത്തരത്തിൽ കഴിഞ്ഞ മാസം ആഘോഷിച്ചിരുന്നു