ദുബായിൽ ഇൻഫ്ലുവൻസ ജാഗ്രത; സ്കൂളുകളിൽ കർശന മാർഗ്ഗനിർദ്ദേശങ്ങൾ

ദുബായിലെ സ്കൂളുകളിൽ ഇൻഫ്ലുവൻസ (പനി) വ്യാപനം തടയുന്നതിനായി കർശനമായ മാർഗ്ഗനിർദ്ദേശങ്ങൾ പ്രഖ്യാപിച്ചു. വിദ്യാർത്ഥികളുടെ സുരക്ഷ ഉറപ്പാക്കുന്നതിൻ്റെ ഭാഗമായി ’24 മണിക്കൂർ നിയമം’ ഉൾപ്പെടെയുള്ള പുതിയ നിർദ്ദേശങ്ങളാണ് സ്കൂളുകൾക്ക് നൽകിയിരിക്കുന്നത്.ഇതനുസരിച്ച്, ഇൻഫ്ലുവൻസയുടെ ലക്ഷണങ്ങൾ പ്രകടിപ്പിക്കുന്ന കുട്ടികളെ വീട്ടിൽത്തന്നെ നിർത്താൻ രക്ഷിതാക്കളോട് സ്കൂളുകൾ ആവശ്യപ്പെട്ടിട്ടുണ്ട്. കുട്ടികൾക്ക് പനിയോ മറ്റ് രോഗലക്ഷണങ്ങളോ ഇല്ലെന്ന് ഉറപ്പുവരുത്തിയ ശേഷം മാത്രമേ സ്കൂളിലേക്ക് അയക്കാവൂ.ഇതിൽ ഏറ്റവും പ്രധാനപ്പെട്ടത് ’24 മണിക്കൂർ നിയമം’ ആണ്.

അതായത്, ഒരു കുട്ടിക്ക് പനിയോ മറ്റ് രോഗലക്ഷണങ്ങളോ ഉണ്ടായിരുന്നെങ്കിൽ, അവരുടെ രോഗലക്ഷണങ്ങൾ പൂർണ്ണമായും മാറിയ ശേഷം, അടുത്ത 24 മണിക്കൂറെങ്കിലും വീട്ടിൽ വിശ്രമിച്ച ശേഷമേ സ്കൂളിലേക്ക് പ്രവേശനം അനുവദിക്കൂ. ഇത് രോഗം മറ്റ് വിദ്യാർത്ഥികളിലേക്ക് പകരുന്നത് തടയാൻ വേണ്ടിയാണ്.രക്ഷിതാക്കൾ ഈ നിയമങ്ങൾ നിർബന്ധമായും പാലിക്കണമെന്ന് സ്കൂൾ അധികൃതർ ഓർമ്മിപ്പിച്ചു. ആരോഗ്യ സുരക്ഷ ഉറപ്പാക്കുന്നതിനായി മാസ്കുകൾ ധരിക്കുന്നതിൻ്റെയും, കൈകൾ വൃത്തിയാക്കുന്നതിൻ്റെയും പ്രാധാന്യത്തെക്കുറിച്ചും സ്കൂളുകൾ വിദ്യാർത്ഥികൾക്ക് അവബോധം നൽകുന്നുണ്ട്.ദുബായ് ഹെൽത്ത് അതോറിറ്റിയുടെയും (DHA) മറ്റ് ആരോഗ്യ സ്ഥാപനങ്ങളുടെയും നിർദ്ദേശങ്ങൾ അനുസരിച്ചാണ് ഈ മാർഗ്ഗനിർദ്ദേശങ്ങൾ നടപ്പിലാക്കുന്നത്. എല്ലാ വിദ്യാർത്ഥികളുടെയും ആരോഗ്യവും സുരക്ഷയും ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.