റിയൽ എസ്റ്റേറ്റ് നിക്ഷേപകർക്ക് യു.എ.ഇ ഗോൾഡൻ വിസ: പുതിയ നിബന്ധനകൾ പുറത്തിറക്കി

റിയൽ എസ്റ്റേറ്റ് നിക്ഷേപകർക്ക് യു.എ.ഇ ഗോൾഡൻ വിസ: പുതിയ നിബന്ധനകൾ പുറത്തിറക്കിയു.എ.ഇയിൽ റിയൽ എസ്റ്റേറ്റ് വഴി ഗോൾഡൻ വിസയ്ക്ക് അപേക്ഷിക്കുന്നവർക്ക് പുതിയ നിബന്ധനകളുമായി ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) രംഗത്ത്. അപേക്ഷയോടൊപ്പം ആരോഗ്യ ഇൻഷുറൻസ് നിർബന്ധമാക്കിയിട്ടുണ്ട്. പുതിയ മാർഗ്ഗനിർദ്ദേശങ്ങൾ അനുസരിച്ച്, ഗോൾഡൻ വിസയ്ക്ക് അപേക്ഷിക്കുമ്പോൾ രണ്ട് വർഷത്തെ സുരക്ഷാ പാക്കേജ് ഉൾപ്പെടുന്ന ആരോഗ്യ ഇൻഷുറൻസ് പോളിസി സമർപ്പിക്കണം. കൂടാതെ, അപേക്ഷകർക്ക് മുൻപുള്ള വിസയുമായി ബന്ധപ്പെട്ട് എന്തെങ്കിലും കുടിശ്ശികകളോ പിഴകളോ ഉണ്ടെങ്കിൽ അത് അടച്ചു തീർക്കുകയും വേണം. ഇവ പൂർത്തിയാക്കിയ ശേഷമേ വിസ സ്റ്റാറ്റസ് മാറ്റം സാധ്യമാകൂ.

ആർക്കൊക്കെ അപേക്ഷിക്കാം?

യു.എ.ഇയിൽ റിയൽ എസ്റ്റേറ്റ് ഗ്രൂപ്പോ സ്വന്തമായി വീടോ ഉള്ള വ്യക്തികൾക്ക് ഗോൾഡൻ വിസയ്ക്ക് അപേക്ഷിക്കാം. കുറഞ്ഞത് 20 ലക്ഷം ദിർഹം (2 മില്യൺ ദിർഹം) മൂല്യമുള്ള സ്വത്ത് ഉണ്ടായിരിക്കണം. ഈ സ്വത്ത് യു.എ.ഇയിലെ അംഗീകൃത റിയൽ എസ്റ്റേറ്റ് കമ്പനികൾ വഴിയോ പ്രാദേശിക സർക്കാർ കാര്യാലയങ്ങളുടെ മേൽനോട്ടത്തിലോ വാങ്ങിയതായിരിക്കണം.

സമർപ്പിക്കേണ്ട രേഖകൾ:

ഗോൾഡൻ വിസയ്ക്ക് അപേക്ഷിക്കുമ്പോൾ പ്രോപ്പർട്ടിയുടെ ടൈറ്റിൽ ഡീഡ്, ഓഫ്-പ്ലാൻ പ്രോപ്പർട്ടിയാണെങ്കിൽ സെയിൽ ആൻഡ് പർച്ചേസ് എഗ്രിമെന്റ്, അല്ലെങ്കിൽ മോർട്ട്‌ഗേജ് ഉണ്ടെങ്കിൽ ബാങ്കിൽ നിന്നുള്ള നോ-ഒബ്ജക്ഷൻ സർട്ടിഫിക്കറ്റ് എന്നിവ സമർപ്പിക്കണം.

മറ്റ് പ്രധാന നിബന്ധനകൾ:

നിർബന്ധിത വൈദ്യ പരിശോധന: 18 വയസ്സിന് മുകളിലുള്ള എല്ലാ അപേക്ഷകർക്കും മെഡിക്കൽ ഫിറ്റ്‌നസ് ടെസ്റ്റ് നിർബന്ധമാണ്.

കുടിശ്ശിക പരിശോധന: അപേക്ഷകന്റെ പേരിൽ യാതൊരുവിധ കുടിശ്ശികയോ പിഴയോ ഇല്ലെന്ന് ഉറപ്പാക്കണം.

അപേക്ഷാ പോർട്ടൽ: www.icp.gov.ae എന്ന വെബ്‌സൈറ്റ് വഴിയോ ICP യു.എ.ഇ സ്മാർട്ട് ആപ്പ് വഴിയോ അപേക്ഷ സമർപ്പിക്കാം.

ഗോൾഡൻ വിസ പരിപാടി യു.എ.ഇയെ റിയൽ എസ്റ്റേറ്റ് നിക്ഷേപത്തിന്റെ ഒരു ആഗോള കേന്ദ്രമാക്കി മാറ്റുന്നതിനും നിക്ഷേപകർക്ക് മികച്ച റെസിഡൻസി അനുഭവം നൽകുന്നതിനും ലക്ഷ്യമിടുന്നു. കൂടുതൽ വിവരങ്ങൾ ആവശ്യമുള്ളവർക്ക് ICP ഔദ്യോഗിക വെബ്‌സൈറ്റോ അമേർ സേവന കേന്ദ്രങ്ങളോ സന്ദർശിക്കാവുന്നതാണ്.