ഗസ്സയിലെ സഹായം വർദ്ധിപ്പിച്ച് സൗദി അറേബ്യ; 7,600 ടണ്ണിലധികം സഹായങ്ങൾ എത്തിച്ചു

ഗസ്സ മുനമ്പിലേക്കുള്ള മാനുഷിക സഹായം സൗദി അറേബ്യ ശക്തമാക്കുകയാണ്. സഹായ വസ്തുക്കൾ വഹിച്ചുള്ള സൗദി വിമാനങ്ങൾ ഈജിപ്തിലെത്തുന്നത് തുടരുകയാണ്. കിംഗ് സൽമാൻ ഹ്യുമാനിറ്റേറിയൻ എയ്ഡ് ആൻഡ് റിലീഫ് സെന്റർ (കെഎസ്റിലീഫ്) പ്രതിരോധ മന്ത്രാലയത്തിന്റെയും കെയ്റോയിലെ സൗദി എംബസിയുടെയും സഹകരണത്തോടെയാണ് സഹായങ്ങൾ ഏകോപിപ്പിക്കുന്നത്.

ഇതുവരെ 67 വിമാനങ്ങളും 8 കപ്പലുകളും വഴി 7,612 ടണ്ണിലധികം ഭക്ഷണം, മരുന്നുകൾ, ഷെൽട്ടർ സാധനങ്ങൾ എന്നിവ സൗദി ഗസ്സയിലെത്തിച്ചു. സഹായ വിതരണം വർദ്ധിപ്പിക്കുന്നതിനായി പ്രത്യേക വ്യോമ, നാവിക കേന്ദ്രങ്ങളും പ്രവർത്തിക്കുന്നുണ്ട്. വെടിനിർത്തലിന് ശേഷവും ഭക്ഷണപ്പൊതികളും ശിശുക്കൾക്കുള്ള പാൽ പാക്കേജുകളും സൗദി വിതരണം ചെയ്യുന്നുണ്ട്. ഫലസ്തീൻ റെഡ് ക്രസന്റ് സൊസൈറ്റിക്ക് 20 ആംബുലൻസുകൾ, ലോജിസ്റ്റിക്കൽ ഉപകരണങ്ങൾ, ജനറേറ്ററുകൾ, വാട്ടർ ടാങ്കറുകൾ എന്നിവയും സൗദി കൈമാറി.

അതിർത്തി അടച്ചിടലുകൾ ഒഴിവാക്കുന്നതിനും സഹായം തടസ്സമില്ലാതെ എത്തിക്കുന്നതിനും ജോർദാനുമായി സഹകരിച്ച് സൗദി വ്യോമ പ്രവർത്തനങ്ങൾ ശക്തിപ്പെടുത്തിയിട്ടുണ്ട്. കൂടാതെ, ഗസ്സ മുനമ്പിൽ 90 മില്യൺ ഡോളറിലധികം മൂല്യമുള്ള ദുരിതാശ്വാസ പദ്ധതികൾ നടപ്പിലാക്കുന്നതിനായി സൗദി അന്താരാഷ്ട്ര സംഘടനകളുമായി വിവിധ കരാറുകളിലും ഒപ്പുവെച്ചിട്ടുണ്ട്.