ഗൂഗിളുമായി സഹകരിച്ച് ഒമാൻ നടപ്പിലാക്കുന്ന വെർച്വൽ സ്ട്രീറ്റ്-ലെവൽ മാപ്പിങ് പദ്ധതിയുടെ രണ്ടാം ഘട്ടം വിജയകരമായി ആരംഭിച്ചു. രാജ്യത്തിന്റെ ഡിജിറ്റൽ സാന്നിധ്യം ശക്തിപ്പെടുത്താനും ടൂറിസം, ബിസിനസ് മേഖലകളെ ശാക്തീകരിക്കാനും ലക്ഷ്യമിട്ടുള്ള ഈ പദ്ധതിയിലൂടെ 360 ഡിഗ്രി പനോരമിക് കവറേജിലേക്ക് പുതിയതായി 27,000 കിലോമീറ്റർ ദൃശ്യങ്ങൾ കൂടി കൂട്ടിച്ചേർത്തു. നാഷണൽ സർവേ ആൻഡ് ജിയോസ്പേഷ്യൽ ഇൻഫർമേഷൻ അതോറിറ്റിയുമായി സഹകരിച്ചാണ് ഗതാഗത, ആശയവിനിമയ, വിവര സാങ്കേതിക മന്ത്രാലയം ഈ വിപുലീകരണം നടത്തുന്നത്.
ഗൂഗിൾ മാപ്പിലെ സ്ട്രീറ്റ് വ്യൂ ഫീച്ചറിലൂടെ ഉപയോക്താക്കൾക്ക് ഒമാന്റെ പ്രകൃതിദൃശ്യങ്ങൾ, ചരിത്രപരമായ ലാൻഡ്മാർക്കുകൾ, ആധുനിക അടിസ്ഥാന സൗകര്യങ്ങൾ എന്നിവ നേരിട്ട് കാണുന്ന അനുഭവം ഇനി ലഭ്യമാകും. വടക്ക് മുസന്ദം മുതൽ തെക്ക് ദോഫാർ വരെയുള്ള എല്ലാ ഗവർണറേറ്റുകളെയും ഉൾപ്പെടുത്തിക്കൊണ്ടാണ് കവറേജ് വ്യാപിപ്പിക്കുന്നത്. ആദ്യ ഘട്ടത്തിൽ ഉൾപ്പെടാത്ത പ്രധാന റൂട്ടുകളും വിനോദസഞ്ചാര കേന്ദ്രങ്ങളും ഈ ഘട്ടത്തിൽ മാപ്പ് ചെയ്തിട്ടുണ്ടെന്ന് മന്ത്രാലയം അറിയിച്ചു. ഗൂഗിളിന്റെ അത്യാധുനിക ‘ട്രെക്കർ’ ഉപകരണങ്ങൾ ഉപയോഗിച്ചാണ് ഈ ദൃശ്യങ്ങൾ പകർത്തിയത്.
പദ്ധതിയുടെ ആദ്യ ഘട്ടത്തിൽ യുനെസ്കോ ലോക പൈതൃക പട്ടികയിലുള്ള ഖോർ റോറി ഉൾപ്പെടെയുള്ള സ്ഥലങ്ങളാണ് മാപ്പ് ചെയ്തിരുന്നത്. അന്ന് ഏകദേശം 36,000 കിലോമീറ്റർ ദൂരമാണ് പൂർത്തിയാക്കിയത്. രണ്ടാമത്തെ ഘട്ടം കൂടി പൂർത്തിയായതോടെ ഒമാന്റെ ആകെ സ്ട്രീറ്റ് വ്യൂ കവറേജ് ഏകദേശം 63,000 കിലോമീറ്ററായി വർധിച്ചു. ഇത് ലോകമെമ്പാടുമുള്ള സഞ്ചാരികൾക്ക് ഒമാനെ ഡിജിറ്റലായി അടുത്തറിയാൻ വലിയ അവസരമാണ് ഒരുക്കുന്നത്.
2026-ൽ പദ്ധതിയുടെ മൂന്നാം ഘട്ടം നടപ്പിലാക്കാനാണ് മന്ത്രാലയം ആസൂത്രണം ചെയ്യുന്നത്. ഒമാന്റെ അതിവേഗം മാറിക്കൊണ്ടിരിക്കുന്ന ഭൂപ്രകൃതിയും പുതിയ അടിസ്ഥാന സൗകര്യങ്ങളും ഡിജിറ്റൽ മാപ്പിൽ കൃത്യമായി രേഖപ്പെടുത്തുന്നതിനായി നേരത്തെ ഉൾപ്പെടുത്തിയ റൂട്ടുകൾ ഈ ഘട്ടത്തിൽ അപ്ഡേറ്റ് ചെയ്യും. ഇതോടെ ഒമാൻ കൂടുതൽ സുതാര്യമായും കൃത്യമായും ഡിജിറ്റൽ ലോകത്ത് അടയാളപ്പെടുത്തപ്പെടും.
Discover more from Radio Keralam 1476 AM News
Subscribe to get the latest posts sent to your email.
