ഒമാന്റെ തലസ്ഥാന നഗരിയെ ആഘോഷലഹരിയിലാക്കുന്ന ‘മസ്കത്ത് നൈറ്റ്സ്’ വിനോദസഞ്ചാര മേളയ്ക്ക് ഇന്ന് തുടക്കമാകും. മേളയുടെ ഭാഗമായി പ്രധാന വേദികളിലൊന്നായ ഖുറം നാച്ചുറൽ പാർക്കിലേക്ക് പൊതുഗതാഗത കമ്പനിയായ മുവാസലാത്ത് സൗജന്യ ബസ് സർവീസ് പ്രഖ്യാപിച്ചു. അറൈമി കോംപ്ലക്സ്, ഫത്ഹ് സ്ക്വയർ എന്നിവിടങ്ങളിൽ നിന്ന് പാർക്കിലേക്കും തിരിച്ചും ഇന്ന് മുതൽ ജനുവരി 31 വരെയാണ് ഈ സേവനം ലഭ്യമാകുക. വൈകിട്ട് 4:30 മുതൽ രാത്രി 11:30 വരെ ഓരോ അര മണിക്കൂർ ഇടവിട്ടായിരിക്കും ബസുകൾ സർവീസ് നടത്തുക.
ഖുറം പാർക്കിന് പുറമെ നസീം ഗാർഡൻ, ഒമാൻ ഓട്ടോമൊബൈൽ അസോസിയേഷൻ ഗ്രൗണ്ട്, സീബ് ബീച്ച്, വാദി അൽ ഖൂദ്, ഖുറിയാത്ത്, ആമിറാത്ത് പാർക്ക്, ബൗഷർ സാൻഡ്സ്, റോയൽ ഓപ്പറ ഹൗസ് മസ്കത്ത് എന്നിങ്ങനെ വിവിധ ഇടങ്ങളിലായാണ് ആഘോഷങ്ങൾ നടക്കുന്നത്. എല്ലാ ദിവസവും വൈകുന്നേരം 4 മുതൽ രാത്രി 11 വരെയാണ് പ്രവേശനം. വാരാന്ത്യങ്ങളിൽ സമയം നീട്ടിനൽകും. കുടുംബങ്ങൾക്കും സ്ത്രീകൾക്കുമായി പ്രത്യേക ദിവസങ്ങളും നീക്കിവെച്ചിട്ടുണ്ട്.
ഓരോ വേദികളിലും വ്യത്യസ്തമായ കാഴ്ചകളാണ് സന്ദർശകരെ കാത്തിരിക്കുന്നത്:
- ആമിറാത്ത് പാർക്ക്: ഒമാന്റെ പാരമ്പര്യവും സംസ്കാരവും വിളിച്ചോതുന്ന ‘ഹെറിറ്റേജ് വില്ലേജ്’.
- ഒമാൻ ഓട്ടോമൊബൈൽ അസോസിയേഷൻ: സർക്കസ് പ്രകടനങ്ങളും വിജ്ഞാനപ്രദമായ പരിപാടികളും.
- സീബ് ബീച്ച്: ബീച്ച് ഫുട്ബോൾ, വോളിബോൾ ടൂർണമെന്റുകൾ ഉൾപ്പെടെയുള്ള കായിക വിനോദങ്ങൾ.
- റോയൽ ഓപ്പറ ഹൗസ്: ലോകോത്തര ഫാഷൻ വീക്കിന് വേദിയാകും.
- വാദി അൽ ഖൂദ്: സിപ്പ്ലൈനിങ്, കാർ ഡ്രിഫ്റ്റിംഗ് തുടങ്ങിയ സാഹസിക വിനോദങ്ങൾ.
പ്രകൃതിരമണീയമായ കാഴ്ചകളും സാഹസിക വിനോദങ്ങളും സാംസ്കാരിക പരിപാടികളും ഒത്തുചേരുന്ന മസ്കത്ത് നൈറ്റ്സ് ഇത്തവണ കൂടുതൽ വർണ്ണാഭമാകുമെന്നാണ് സംഘാടകർ പ്രതീക്ഷിക്കുന്നത്.
Discover more from Radio Keralam 1476 AM News
Subscribe to get the latest posts sent to your email.
