പുതുവത്സര ആഘോഷങ്ങളുടെ ഭാഗമായി ജനുവരി ഒന്നിന് നഗരത്തിലെ പൊതു പാർക്കിങ് സൗകര്യം സൗജന്യമാക്കി ദുബായ് റോഡ് ഗതാഗത അതോറിറ്റി (RTA) ഉത്തരവിട്ടു. ബഹുനില പാർക്കിങ് കെട്ടിടങ്ങൾക്കും അൽ ഖൈൽ ഗേറ്റ് (N-365) എന്നിവയ്ക്കും ഈ സൗജന്യം ബാധകമായിരിക്കില്ല. ജനുവരി രണ്ട് മുതൽ പാർക്കിങ് ഫീസുകൾ പുനരാരംഭിക്കും.
ആഘോഷങ്ങൾ കണക്കിലെടുത്ത് മെട്രോ, ബസ് സർവീസുകളുടെ സമയത്തിലും മാറ്റം വരുത്തിയിട്ടുണ്ട്:
- ദുബായ് മെട്രോ: ഡിസംബർ 31 രാവിലെ 5 മണി മുതൽ ജനുവരി ഒന്നിന് രാത്രി 11.59 വരെ മെട്രോ ട്രെയിനുകൾ തുടർച്ചയായി സർവീസ് നടത്തും.
- ദുബായ് ട്രാം: ഡിസംബർ 31 രാവിലെ 6 മണി മുതൽ ജനുവരി രണ്ട് പുലർച്ചെ ഒരു മണി വരെ ട്രാം ലഭ്യമായിരിക്കും.
- ആർ.ടി.എ ബസ്: അബൂദബിയിലേക്കുള്ള E-11 സർവീസുകൾ ഡിസംബർ 31 ഉച്ചയ്ക്ക് ശേഷം ജനുവരി 4 വരെ ഉണ്ടായിരിക്കില്ല. പകരം ഇബ്നു ബത്തൂത്ത സ്റ്റേഷനിൽ നിന്നുള്ള E-101, E-102 ബസുകളെ ആശ്രയിക്കാം.
പുതുവത്സര ദിനത്തിൽ വെഹിക്കിൾ ടെസ്റ്റിങ് സെന്ററുകൾക്കും കസ്റ്റമർ ഹാപ്പിനസ് സെന്ററുകൾക്കും അവധിയായിരിക്കും. എന്നാൽ അൽ ബർഷ, അൽ തവാർ തുടങ്ങിയ പ്രധാന സ്മാർട്ട് സെന്ററുകൾ 24 മണിക്കൂറും പ്രവർത്തിക്കും. തിരക്ക് ഒഴിവാക്കാൻ യാത്രക്കാർ പൊതുഗതാഗത സംവിധാനങ്ങൾ ഉപയോഗിക്കണമെന്ന് ആർ.ടി.എ നിർദ്ദേശിച്ചു.
Discover more from Radio Keralam 1476 AM News
Subscribe to get the latest posts sent to your email.
