അബുദാബി എയർപോർട്ട് സിറ്റി ചെക്ക്-ഇൻ സേവനം ഇനി മുറൂർ റോഡിലും

അബുദാബി എയർപോർട്ട് സിറ്റി ചെക്ക്-ഇൻ സേവനം മുറൂർ റോഡിലുള്ള ഇത്തിഹാദ് എയർവേസ് ഓഫീസിൽ ആരംഭിക്കുന്നു. നവംബർ 24 മുതലാണ് മദീന സായിദ് ഷോപ്പിങ് മാളിന് എതിർവശത്തുള്ള ഈ കേന്ദ്രത്തിൽ സിറ്റി ചെക്ക്-ഇൻ സൗകര്യം ലഭ്യമാകുക. വിമാനസമയത്തിന് 24 മണിക്കൂർ മുമ്പ് മുതൽ 4 മണിക്കൂർ മുമ്പു വരെ ഈ കേന്ദ്രത്തിൽ യാത്രക്കാർക്ക് ബാഗേജ് നൽകി ബോർഡിങ് കാർഡ് കൈപ്പറ്റാം. മൊറാഫിക് ഏവിയേഷൻ സർവീസിന് കീഴിൽ ആരംഭിച്ചിട്ടുള്ള ഈ കേന്ദ്രം, രാവിലെ 10 മുതൽ രാത്രി 10 വരെയാണ് പ്രവർത്തിക്കുക.

ഇത്തിഹാദ് എയർവേസ്, എയർ അറേബ്യ, ഇൻഡിഗോ, വിസ് എയർ, ഈജിപ്ത് എയർ എന്നീ വിമാനങ്ങളിൽ യാത്ര ചെയ്യുന്നവർക്കാണ് നിലവിൽ സിറ്റി ചെക്ക്-ഇൻ സൗകര്യം ഒരുക്കിയിട്ടുള്ളത്. നിലവിൽ അബുദാബി മീന തുറമുഖത്തെ ക്രൂയിസ് ടെർമിനലിൽ 24 മണിക്കൂറും ഈ സേവനം ലഭ്യമാണ്. കൂടാതെ, യാസ് ഐലൻഡിലെ ക്രൗൺ പ്ലാസ ഹോട്ടൽ, മുസ്സഫ ഷാബിയ പതിനൊന്ന്, അൽ ഐൻ കുവൈറ്റാറ്റ് ലുലു മാൾ എന്നിവിടങ്ങളിലെ സിറ്റി ചെക്ക്-ഇൻ കേന്ദ്രങ്ങൾ രാവിലെ 10 മുതൽ രാത്രി 10 വരെ പ്രവർത്തിക്കുന്നു.

ബാഗേജുകൾ മുൻകൂട്ടി നൽകി ബോർഡിങ് പാസ് എടുക്കുന്ന യാത്രികർക്ക് വിമാനത്താവളത്തിൽ നീണ്ട ക്യൂവിൽ നിൽക്കാതെ നേരിട്ട് എമിഗ്രേഷൻ വിഭാഗത്തിലേക്ക് പോകാൻ കഴിയും എന്നുള്ളതാണ് സിറ്റി ചെക്ക്-ഇൻ സേവനത്തെ ജനപ്രിയമാക്കുന്നത്. കുടുംബത്തോടൊപ്പം യാത്ര ചെയ്യുന്നവർക്ക് ഇത് ഏറെ ആശ്വാസകരമാണ്. മുതിർന്നവർക്ക് 35 ദിർഹമും കുട്ടികൾക്ക് 25 ദിർഹവുമാണ് ചെക്ക്-ഇൻ സേവനത്തിനുള്ള നിരക്ക്. കൂടുതൽ വിവരങ്ങൾ അറിയാനായി 800 667 2347 എന്ന ടോൾ ഫ്രീ നമ്പറിൽ ബന്ധപ്പെടാവുന്നതാണ്.