2025 ലെ രണ്ടാം പാദത്തിൽ 88% ഓൺ-ടൈം പെർഫോമൻസ് കൈവരിച്ച് ഒമാന്റെ ബജറ്റ് വിമാനക്കമ്പനിയായ സലാം എയർ. 2025 ലെ രണ്ടാം പാദത്തിലെ ഓൺ-ടൈം പെർഫോമൻസ് (OTP) ഡാറ്റ ഇന്നാണ് പുറത്തുവിട്ടത്.വിമാനങ്ങൾ കൃത്യസമയത്ത് പുറപ്പെടുന്നതിനെ പ്രതിഫലിപ്പിക്കുന്നതാണ് ഓൺ-ടൈം പെർഫോമൻസ് -ഒടിപി നിരക്ക്. കൂടാതെ ഒരു എയർലൈനിന്റെ ഉപഭോക്താക്കളോടുള്ള കൃത്യനിഷ്ഠത നിറവേറ്റാനുള്ള കഴിവിന്റെ സൂചകവുമാണിത്.
2025 ഏപ്രിൽ മുതൽ ജൂൺ വരെ സലാം എയർ 5,144 വിമാന സർവീസുകളാണ് നടത്തിയത്. 7,12,610 യാത്രക്കാർ സർവീസുകൾ ഉപയോഗപ്പെടുത്തി. സർവീസുകളിൽ 88 ശതമാനം ഓൺ-ടൈം പെർഫോമൻസ് നിരക്ക് കൈവരിച്ചു.വർഷത്തിലെ ആദ്യ പാദത്തിൽ, ഓൺ-ടൈം പെർഫോമൻസ് 78 ശതമാനമായിരുന്നു. ഇതിനെ അപേക്ഷിച്ച് 10 ശതമാനത്തിന്റെ ഗണ്യമായ വർധനവാണ് കൈവരിച്ചത്. സമീപകാലത്ത് മേഖല നേരിടുന്ന പ്രവർത്തനപരവും രാഷ്ട്രീയവുമായ വെല്ലുവിളികൾക്കിടയിലും കൃത്യനിഷ്ഠ പാലിക്കുന്നതിനുള്ള എയർലൈനിന്റെ പ്രതിബദ്ധത ഇത് അടിവരയിടുന്നു.
