ഖത്തറിലെ യുഎസ് വിമാനങ്ങളും ബഹ്റൈനിലെ കപ്പലും കാണാനില്ല; അമേരിക്കയുടെ രഹസ്യനീക്കം?

ഇറാനും ഇസ്രായേലും തമ്മിലുള്ള സംഘർഷം മൂർച്ഛിക്കുന്നതിനിടെ ഗൾഫ് മേഖലയിൽ അമേരിക്കയുടെ രഹസ്യ സൈനിക നീക്കങ്ങൾ നടക്കുന്നതായി സൂചന. ഖത്തറിലെ അൽ ഉദൈദ് വ്യോമതാവളത്തിൽ നിന്ന് യുഎസ് സൈനിക വിമാനങ്ങൾ അപ്രത്യക്ഷമായതായും ബഹ്റൈനിലെ യുഎസ് നാവിക ആസ്ഥാനത്ത് നിന്ന് കപ്പലുകൾ മാറ്റിയതായും റിപ്പോർട്ടുകൾ പുറത്തുവന്നു. ഇത് ഇറാനെതിരായ സൈനിക നീക്കത്തിനുള്ള മുന്നൊരുക്കമാണോ അതോ ആക്രമണ സാധ്യത മുൻനിർത്തിയുള്ള മുൻകരുതലാണോ എന്നതിനെക്കുറിച്ച് ഊഹാപോഹങ്ങൾ ശക്തമാണ്.

പശ്ചിമേഷ്യയിൽ അമേരിക്കൻ സൈന്യത്തിന്റെ ഏറ്റവും വലിയ താവളങ്ങളിലൊന്നാണ് ഖത്തറിലെ അൽ ഉദൈദ് വ്യോമതാവളം. ഏകദേശം 13,000 അമേരിക്കൻ സൈനികരാണ് ഇവിടെയുള്ളത്. ഇറാഖിലെയും സിറിയയിലെയും യുഎസ് സൈനിക നീക്കങ്ങൾ പലപ്പോഴും നിയന്ത്രിച്ചിരുന്നത് ഈ താവളത്തിൽ നിന്നായിരുന്നു. അടുത്തിടെ പ്ലാനറ്റ് ലാബ്സ് പിബിസിയുടെ ഉപഗ്രഹ ചിത്രങ്ങൾ പരിശോധിച്ചതിൽ, അൽ ഉദൈദിൽ സാധാരണയായി കാണാറുള്ള സൈനിക യാത്രാ വിമാനങ്ങളും, യുദ്ധവിമാനങ്ങളും, ഡ്രോണുകളും ഉൾപ്പെടെയുള്ളവ അപ്രത്യക്ഷമായതായി അസോസിയേറ്റഡ് പ്രസ് റിപ്പോർട്ട് ചെയ്തു.

അതേസമയം, ബഹ്റൈനിലെ യുഎസ് നേവിയുടെ അഞ്ചാം ഫ്ലീറ്റിന്റെ ആസ്ഥാനത്തും സമാനമായ മാറ്റങ്ങൾ നിരീക്ഷിക്കപ്പെട്ടിട്ടുണ്ട്. ഇവിടെ നങ്കൂരമിടാറുള്ള നിരവധി കപ്പലുകളും നിലവിൽ കാണാനില്ലെന്നാണ് റിപ്പോർട്ടുകൾ. അമേരിക്കൻ ഉദ്യോഗസ്ഥരെ ഉദ്ധരിച്ച് റോയിട്ടേഴ്സ് പുറത്തുവിട്ട വിവരങ്ങൾ ഈ നീക്കങ്ങളെ ശരിവെക്കുന്നുണ്ട്. എന്നാൽ, ഈ സൈനിക നീക്കങ്ങളെക്കുറിച്ച് അമേരിക്കൻ സൈന്യം ഔദ്യോഗികമായി പ്രതികരിച്ചിട്ടില്ല.

ഇറാന്റെ ഭാഗത്ത് നിന്ന് തിരിച്ചടി ഭയന്നുള്ള ഒരു മുൻകരുതൽ നടപടിയായി ഇതിനെ കാണുന്നവരുണ്ട്. പശ്ചിമേഷ്യയിലെ തങ്ങളുടെ താവളങ്ങൾ ആക്രമിക്കുമെന്ന് ഇറാൻ നേരത്തെ മുന്നറിയിപ്പ് നൽകിയിരുന്നു. എന്നാൽ, ഇറാനെതിരായ ഒരു വലിയ സൈനിക നീക്കത്തിനുള്ള തയ്യാറെടുപ്പാണ് ഇതെന്ന സംശയവും ശക്തമാണ്. ഡൊണാൾഡ് ട്രംപ് ഭരണകൂടം ഒരു വശത്ത് ചർച്ചയ്ക്ക് തയ്യാറാണെന്ന് പറയുമ്പോഴും, ഇറാനെതിരെ ശക്തമായ മുന്നറിയിപ്പുകൾ നൽകുന്നത് ഈ സംശയങ്ങൾക്ക് ആക്കം കൂട്ടുന്നു. ഈ സാഹചര്യത്തിൽ, ഗൾഫ് മേഖലയിലെ രാജ്യങ്ങളായ ഖത്തർ, ഒമാൻ, സൗദി അറേബ്യ, യുഎഇ എന്നിവ സമാധാന ശ്രമങ്ങൾ ഊർജിതപ്പെടുത്തിയിരിക്കുകയാണ്. ഇറാനും അമേരിക്കയും തമ്മിലുള്ള ഏതൊരു സംഘർഷവും മേഖലയുടെ മൊത്തം സുരക്ഷയെ ബാധിക്കുമെന്ന ആശങ്കയിലാണ് ഈ രാജ്യങ്ങൾ. വരും ദിവസങ്ങളിൽ ഈ സൈനിക നീക്കങ്ങളുടെ യഥാർത്ഥ ലക്ഷ്യത്തെക്കുറിച്ച് കൂടുതൽ വ്യക്തത വരുമെന്നാണ് പ്രതീക്ഷിക്കുന്നത്.