വിവാദങ്ങൾക്കും നിയമനടപടികൾക്കും പിന്നാലെ സംസ്ഥാന സർക്കാർ നേരിട്ട് വിപണിയിലിറക്കുന്ന പുതിയ മദ്യത്തിന്റെ പേര് മാറ്റി. ‘മലബാർ മിസ്റ്ററി’ എന്ന പേരിന് പകരം ‘മിന്നൽ മാജിക്’ (Minnal Magic) എന്ന പേരാണ് മലബാർ ഡിസ്റ്റിലറീസ് ഇപ്പോൾ നിശ്ചയിച്ചിരിക്കുന്നത്. മിന്നൽ മാജിക് എന്നതിന്റെ ചുരുക്കരൂപമായ ‘എം.എം’ (MM) എന്ന പേരിലായിരിക്കും ഈ മദ്യം അറിയപ്പെടുക. നേരത്തെ ജനങ്ങൾ നിർദ്ദേശിച്ച പേരായിരുന്നു മലബാർ മിസ്റ്ററി എന്നത്. എന്നാൽ, ഈ പേര് നൽകുന്നത് കോടതി അലക്ഷ്യമാകാൻ സാധ്യതയുണ്ടെന്ന നിയമോപദേശത്തെ തുടർന്നാണ് അവസാന നിമിഷം പേര് മാറ്റാൻ അധികൃതർ തീരുമാനിച്ചത്.
ഇന്ന് രാവിലെ പത്ത് മണിക്ക് എക്സൈസ് മന്ത്രി എം.ബി. രാജേഷ് പുതിയ മദ്യത്തിന്റെ പേരും ലോഗോയും ഔദ്യോഗികമായി പുറത്തിറക്കും. ഒരു മാസത്തിനകം മദ്യം വിപണിയിലെത്തിക്കാനാണ് സർക്കാർ ലക്ഷ്യമിടുന്നത്. നിലവിൽ സർക്കാരിന്റെ പ്രശസ്ത ബ്രാൻഡായ ‘ജവാൻ’ റമ്മിനോട് സമാനമായ വിലയായിരിക്കും പുതിയ ബ്രാൻഡിനും ഉണ്ടാവുക എന്നാണ് സൂചന. സാധാരണക്കാർക്ക് താങ്ങാനാവുന്ന വിലയിൽ ഗുണമേന്മയുള്ള മദ്യം ലഭ്യമാക്കുക എന്നതാണ് സർക്കാർ ഇതിലൂടെ ഉദ്ദേശിക്കുന്നത്.
പാലക്കാട് ചിറ്റൂരിലുള്ള 75,000 ചതുരശ്ര അടി വിസ്തീർണ്ണമുള്ള പ്ലാന്റിലാണ് ഉൽപാദനം നടക്കുക. പ്രതിദിനം 13,500 കെയ്സ് മദ്യം (ഏകദേശം 1,08,000 ലിറ്റർ) വിപണിയിലിറക്കാനാണ് പദ്ധതി വിഭാവനം ചെയ്തിരിക്കുന്നത്. തിരുവല്ല ട്രാവൻകൂർ ഷുഗേഴ്സ്, ബവ്കോ സംഭരണകേന്ദ്രങ്ങൾ എന്നിവിടങ്ങളിൽ നിന്നുള്ള ജീവനക്കാരെ ഡെപ്യൂട്ടേഷൻ വ്യവസ്ഥയിൽ ഇവിടെ നിയമിക്കും. ഉൽപാദനത്തിന് ആവശ്യമായ വെള്ളം മലമ്പുഴ ഡാമിൽ നിന്ന് നേരിട്ടെത്തിക്കാനാണ് പ്രാഥമിക തീരുമാനം. കേരള മുഖ്യമന്ത്രി പിണറായി വിജയൻ നേരത്തെ ഇത്തരം പദ്ധതികൾ പൊതുമേഖലാ സ്ഥാപനങ്ങളുടെ കരുത്ത് വർദ്ധിപ്പിക്കുമെന്ന് വ്യക്തമാക്കിയിരുന്നു.
