വോട്ടർപട്ടികയിലെ സംക്ഷിപ്ത പുനഃപരിശോധനയുടെ (എസ്ഐആർ) സമയക്രമത്തിൽ മാറ്റം വരുത്തില്ലെന്നും, ഡിസംബർ 9-ന് തന്നെ കരട് പട്ടിക പ്രസിദ്ധീകരിക്കുമെന്നും മുഖ്യ തിരഞ്ഞെടുപ്പ് ഓഫീസർ അറിയിച്ചു. തദ്ദേശ തിരഞ്ഞെടുപ്പ് കാലമായതിനാൽ എസ്ഐആർ മാറ്റിവയ്ക്കണമെന്ന് സംസ്ഥാന സർക്കാരും വിവിധ രാഷ്ട്രീയ പാർട്ടികളും സുപ്രീം കോടതിയെ സമീപിച്ചതിന് പിന്നാലെ തിരഞ്ഞെടുപ്പ് കമ്മീഷൻ വിളിച്ചുചേർത്ത യോഗത്തിലാണ് ഈ ആവശ്യം വീണ്ടും ഉയർന്നത്.
ബിജെപി ഒഴികെയുള്ള എല്ലാ പാർട്ടികളും എസ്ഐആർ പരിഷ്കരണത്തിന്റെ സമയപരിധി നീട്ടണമെന്ന് ആവശ്യപ്പെട്ടു. “സമയക്രമം മാറ്റുന്നില്ലെങ്കിൽ എസ്ഐആർ എങ്ങനെയും പൂർത്തിയാകുമെങ്കിലും അത് ഒരു ദുരന്തമായി മാറും” എന്ന് സിപിഎം വിമർശിച്ചു. സമയക്രമം പാലിച്ചാൽ നിരവധി പേർ പട്ടികയ്ക്ക് പുറത്താകുമെന്ന് കോൺഗ്രസും, കമ്മീഷൻ പൗരത്വം വെച്ചാണ് കളിക്കുന്നതെന്ന് മുസ്ലിം ലീഗും വിമർശനമുയർത്തി.
അതേസമയം, ബിഎൽഒ അനീഷ് ജോർജ്ജിന്റെ മരണത്തിന് കാരണം ജോലി സമ്മർദ്ദമാണെന്ന സിപിഎമ്മിന്റെ ആരോപണത്തോട്, അനീഷ് ജോർജ്ജിന്റെത് സ്വാഭാവിക മരണമെന്ന നിലയിലാണ് കമ്മീഷൻ പ്രതികരിച്ചതെന്ന് സിപിഎം കുറ്റപ്പെടുത്തി. എന്നാൽ, രാഷ്ട്രീയ താൽപര്യം വെച്ചാണ് എസ്ഐആറിനെ എതിർക്കുന്നതെന്നും സർവീസ് സംഘടനകളെ ഉപയോഗിച്ച് ഇതിനെ അട്ടിമറിക്കാൻ ശ്രമം നടക്കുന്നതായും ബിജെപി ആരോപിച്ചു. പാർട്ടി ഗ്രാമങ്ങളിലെ ബിഎൽഒമാർക്ക് സുരക്ഷ ഉറപ്പാക്കണമെന്നും ബിജെപി യോഗത്തിൽ ആവശ്യപ്പെട്ടു.
ബിഎൽഒമാരെ സമ്മർദ്ദത്തിലാക്കുന്നുവെന്ന പാർട്ടികളുടെ വിമർശനം മുഖ്യ തിരഞ്ഞെടുപ്പ് ഓഫീസർ തള്ളിക്കളഞ്ഞു. എസ്ഐആർ നീട്ടണമെന്ന ആവശ്യത്തോട് യോഗത്തിൽ പ്രതികരിച്ചില്ലെങ്കിലും, വാർത്താ സമ്മേളനത്തിൽ രത്തൻ ഖേൽക്കർ സമയക്രമം മാറ്റില്ലെന്ന് ഉറപ്പിച്ചു പറഞ്ഞു. ബിഎൽഒമാരുടെ പരിശീലനക്കുറവ് പരിഹരിക്കുമെന്നും, പ്രവാസി വോട്ടർമാരുടെ ആശങ്ക അകറ്റാൻ യോഗം വിളിക്കണമെന്ന് നോർക്കയോട് വീണ്ടും ആവശ്യപ്പെടുമെന്നും അദ്ദേഹം കൂട്ടിച്ചേർത്തു.
Discover more from Radio Keralam 1476 AM News
Subscribe to get the latest posts sent to your email.
