നിയമസഭാ വോട്ടർപട്ടിക പുതുക്കുന്നതിന്റെ ഭാഗമായി എന്യൂമറേഷൻ ഫോം സമർപ്പിക്കാനുള്ള സമയപരിധി നാളെ (ഡിസംബർ 18) അവസാനിക്കും. നിലവിൽ പട്ടികയിൽ ഇല്ലാത്തവർക്കും മാറ്റങ്ങൾ വരുത്തേണ്ടവർക്കും ഈ അവസരം പ്രയോജനപ്പെടുത്താം. സ്ഥലത്തില്ലാത്തവർ, താമസം മാറിയവർ, മരണപ്പെട്ടവർ എന്നിവരുടെ പട്ടികയിലെ തിരുത്തലുകൾ ഡിസംബർ 18-നകം പൂർത്തിയാക്കുമെന്ന് മുഖ്യ തിരഞ്ഞെടുപ്പ് ഓഫീസർ ഡോ. രത്തൻ യു. കേൽക്കർ അറിയിച്ചു.
പ്രധാന തീയതികൾ
- ഡിസംബർ 18: എന്യൂമറേഷൻ ഫോം സമർപ്പിക്കാനുള്ള അവസാന തീയതി.
- ഡിസംബർ 23 – ജനുവരി 22: ആക്ഷേപങ്ങളും പരാതികളും സമർപ്പിക്കാനുള്ള കാലയളവ്.
- ഫെബ്രുവരി 21: അന്തിമ വോട്ടർപട്ടിക പ്രസിദ്ധീകരിക്കും.
വോട്ടർപട്ടിക പരിശോധിക്കുന്നത് എങ്ങനെ?
കരട് വോട്ടർപട്ടിക പ്രസിദ്ധീകരിച്ച ശേഷം അത് ഇലക്ടറൽ ഓഫീസുകളുടെ നോട്ടീസ് ബോർഡിലും മുഖ്യ തിരഞ്ഞെടുപ്പ് ഓഫീസറുടെ വെബ്സൈറ്റിലും ലഭ്യമാകും. പേര് ഉൾപ്പെടാത്തവർക്ക് ബി.എൽ.ഒ (BLO) മാരുടെ കൈവശമുള്ള പട്ടികയും പരിശോധിക്കാവുന്നതാണ്.
ഏത് ഫോമാണ് നൽകേണ്ടത്?
നിശ്ചിത സമയത്തിനുള്ളിൽ എന്യൂമറേഷൻ ഫോം നൽകാൻ കഴിയാത്തവർക്ക് ഡിസംബർ 23 മുതൽ ജനുവരി 22 വരെയുള്ള കാലയളവിൽ താഴെ പറയുന്ന ഫോമുകൾ വഴി അപേക്ഷിക്കാം:
- ഫോം 6: പുതുതായി പേര് ചേർക്കുന്നതിന്.
- ഫോം 6A: പ്രവാസി വോട്ടർമാർക്ക് പേര് ചേർക്കാൻ.
- ഫോം 7: മരണം, താമസം മാറിക്കൽ, ഇരട്ടിപ്പ് എന്നിവ കാരണം പേര് ഒഴിവാക്കാൻ.
- ഫോം 8: വിലാസം മാറുന്നതിനും തിരുത്തലുകൾ വരുത്തുന്നതിനും.
അപേക്ഷകൾ https://voters.eci.gov.in/ എന്ന ലിങ്ക് വഴി ഓൺലൈനായി സമർപ്പിക്കാം.
തുടർച്ചയായ പുതുക്കൽ
അന്തിമ പട്ടിക പ്രസിദ്ധീകരിച്ച ശേഷവും നിയമസഭാ തിരഞ്ഞെടുപ്പിനുള്ള നാമനിർദ്ദേശ പത്രിക സമർപ്പിക്കേണ്ട അവസാന തീയതി വരെ പേര് ചേർക്കാൻ അവസരമുണ്ടാകും. എങ്കിലും പരമാവധി ആളുകൾ ഇപ്പോൾത്തന്നെ വോട്ടർപട്ടികയിലെ കൃത്യത ഉറപ്പാക്കണമെന്ന് തിരഞ്ഞെടുപ്പ് ഓഫീസർ അഭ്യർത്ഥിച്ചു.
Discover more from Radio Keralam 1476 AM News
Subscribe to get the latest posts sent to your email.
