അധ്യാപകർക്ക് കെ-ടെറ്റ് നിർബന്ധമാക്കിയ ഉത്തരവ് താൽക്കാലികമായി മരവിപ്പിച്ചു

സംസ്ഥാനത്തെ അധ്യാപക നിയമനത്തിനും സ്ഥാനക്കയറ്റങ്ങൾക്കും കെ-ടെറ്റ് (K-TET) നിർബന്ധമാക്കിക്കൊണ്ടുള്ള പൊതുവിദ്യാഭ്യാസ വകുപ്പിന്റെ ഉത്തരവ് താൽക്കാലികമായി മരവിപ്പിച്ചു. അധ്യാപക സംഘടനകളുടെ ശക്തമായ എതിർപ്പിനെത്തുടർന്നാണ് സർക്കാർ ഈ തീരുമാനമെടുത്തതെന്ന് വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. സുപ്രീം കോടതി ഉത്തരവിന്റെ പശ്ചാത്തലത്തിലാണ് സർക്കാർ നേരത്തെ ഇത്തരമൊരു ഉത്തരവ് പുറപ്പെടുവിച്ചത്.

നിലവിലെ സാഹചര്യത്തിൽ ഈ ഉത്തരവിനെതിരെ സർക്കാർ സുപ്രീം കോടതിയിൽ റിവ്യൂ ഹർജി നൽകുമെന്ന് മന്ത്രി വ്യക്തമാക്കി. ഫെബ്രുവരിയിൽ പ്രത്യേക കെ-ടെറ്റ് പരീക്ഷ നടത്താൻ നിശ്ചയിച്ചിട്ടുണ്ട്. ഈ പരീക്ഷയ്ക്ക് ശേഷം മാത്രമേ സ്ഥാനക്കയറ്റം ഉൾപ്പെടെയുള്ള കാര്യങ്ങളിൽ പുതിയ ഉത്തരവ് പുറപ്പെടുവിക്കുകയുള്ളൂ. അധ്യാപകരുടെ സ്ഥാനക്കയറ്റത്തിൽ നിലനിൽക്കുന്ന അവ്യക്തത പരിഹരിക്കുമെന്നും മന്ത്രി കൂട്ടിച്ചേർത്തു.

സ്ഥാനക്കയറ്റത്തിന് കെ-ടെറ്റ് നിർബന്ധമാക്കുന്നത് നിലവിലുള്ള അധ്യാപകരെ ദോഷകരമായി ബാധിക്കുമെന്ന ആശങ്ക സംഘടനകൾ പങ്കുവെച്ചിരുന്നു. ഈ പശ്ചാത്തലത്തിലാണ് സർക്കാർ നടപടി മരവിപ്പിക്കാൻ തയ്യാറായത്. പുതിയ പരീക്ഷാഫലം വരുന്നതോടെ കൂടുതൽ അധ്യാപകർക്ക് യോഗ്യത നേടാനാകുമെന്നും അതിനുശേഷം നിയമപരമായ വശങ്ങൾ പരിശോധിച്ച് വ്യക്തമായ മാർഗ്ഗരേഖ പുറത്തിറക്കുമെന്നുമാണ് വിദ്യാഭ്യാസ വകുപ്പിന്റെ നിലപാട്.