ധർമസ്ഥല കൂട്ടക്കൊലക്കേസ്: തെളിവില്ലാതെ അന്വേഷണം അവസാനിപ്പിക്കാനൊരുങ്ങി എസ്‌ഐടി

മുൻ ശുചീകരണ തൊഴിലാളിയായ സി.എൻ. ചിന്നയ്യയുടെ വെളിപ്പെടുത്തലുകളെ തുടർന്ന് സംസ്ഥാന സർക്കാർ രൂപീകരിച്ച പ്രത്യേക അന്വേഷണ സംഘം (എസ്.ഐ.ടി.) തെളിവുകൾ കണ്ടെത്താനാവാതെ അന്വേഷണം അവസാനിപ്പിക്കാനൊരുങ്ങുന്നു. ധർമ്മസ്ഥലയിൽ നൂറിലധികം പെൺകുട്ടികളുടെയും യുവതികളുടെയും മൃതദേഹങ്ങൾ കൂട്ടത്തോടെ സംസ്‌കരിച്ചു എന്നായിരുന്നു മാണ്ഡ്യ സ്വദേശിയായ ചിന്നയ്യ പരാതി നൽകിയത്. നിർബന്ധിതമായി ഈ കൂട്ട ശവസംസ്‌കാരം നടത്തേണ്ടി വന്നതിന്റെ ഓർമ്മകൾ വേട്ടയാടുന്നതിനാലാണ് താൻ വെളിപ്പെടുത്തൽ നടത്തിയതെന്നും അദ്ദേഹം മൊഴി നൽകിയിരുന്നു.

ജൂലൈ 19-ന് മുതിർന്ന ഐ.പി.എസ്. ഉദ്യോഗസ്ഥനായ ഡോ. പ്രണബ് കുമാർ മൊഹന്തിയുടെ നേതൃത്വത്തിലാണ് ഈ പ്രത്യേക അന്വേഷണ സംഘത്തെ നിയോഗിച്ചത്.

ചിന്നയ്യ ചൂണ്ടിക്കാട്ടിയ 18-ഓളം ശ്മശാന സ്ഥലങ്ങളിൽ എസ്.ഐ.ടി. പരിശോധന നടത്തി. ഇവിടെനിന്ന് ലഭിച്ച മൃതദേഹാവശിഷ്ടങ്ങളുടെ ഡി.എൻ.എ., ഫോറൻസിക് വിശകലന നടപടികൾ പുരോഗമിക്കുകയാണ്. എന്നാൽ, നേത്രാവതി കടവിന് സമീപത്തുനിന്ന് കണ്ടെത്തിയ അവശിഷ്ടങ്ങൾ പുരുഷന്മാരുടേതാണെന്ന് ഫോറൻസിക് സയൻസ് ലബോറട്ടറി (എഫ്.എസ്.എൽ.) റിപ്പോർട്ട് ചെയ്തു. ഇത് പരാതിക്കാരന്റെ വാദങ്ങൾക്ക് വിരുദ്ധമാണ്. ബംഗ്ലഗുഡ്ഡെയിൽ നിന്ന് കുഴിച്ചെടുത്ത അഞ്ച് തലയോട്ടികളുടെ ഫലങ്ങൾക്കായി എസ്.ഐ.ടി. കാത്തിരിക്കുകയാണ്. കേസിലെ മറ്റൊരു പരാതിക്കാരിയായ സുജാത ഭട്ട്, 2003-ൽ ധർമ്മസ്ഥലയിൽ വെച്ച് തന്റെ മകളെ കാണാതായെന്ന് ആരോപിച്ചിരുന്നു. എന്നാൽ, പിന്നീട് ഇവർ മൊഴി പിൻവലിക്കുകയും, മറ്റുള്ളവരുടെ സമ്മർദ്ദത്തിന് വഴങ്ങി തെറ്റായ അവകാശവാദം ഉന്നയിച്ചതാണെന്നും തനിക്ക് മകളില്ലെന്നും സമ്മതിക്കുകയുമുണ്ടായി.

തെളിവായി ചിന്നയ്യ അന്വേഷണ സംഘത്തിന് കൈമാറിയ തലയോട്ടിക്ക് 40 വർഷത്തിലേറെ പഴക്കമുണ്ടെന്നും, ഇത് 2012-ൽ ബലാത്സംഗത്തിനിരയായി കൊല്ലപ്പെട്ട വിദ്യാർഥിനി സൗജന്യയുടെ മാതൃസഹോദരൻ നൽകിയതാണെന്നും കണ്ടെത്തി. തെറ്റായ വിവരങ്ങൾ നൽകിയതിന്റെ പേരിൽ ചിന്നയ്യക്കെതിരെ എസ്.ഐ.ടി. കേസെടുക്കുകയും ഇയാൾക്കുള്ള സുരക്ഷ പിൻവലിക്കുകയും ചെയ്തു. അറസ്റ്റിലായ ചിന്നയ്യ നിലവിൽ ജയിലിലാണ്.