സൗദി ഭരണാധികാരി സൽമാൻ രാജാവിന്റെ രക്ഷാകർതൃത്വത്തിൽ അഞ്ചാമത് അന്താരാഷ്ട്ര ഹജ്ജ് കോൺഫറൻസിനും എക്സിബിഷനും നവംബർ 9 മുതൽ ജിദ്ദ ആതിഥേയത്വം വഹിക്കും. ഹജ്ജ് തീർത്ഥാടകർക്കുള്ള സേവനങ്ങൾ മെച്ചപ്പെടുത്തുക എന്ന ലക്ഷ്യത്തോടെയാണ് നാല് ദിവസത്തെ പരിപാടി സംഘടിപ്പിക്കുന്നത്. ‘മക്കയിൽ നിന്ന് ലോകത്തിലേക്ക്’ എന്ന പ്രമേയത്തിൽ ഹജ്ജ്, ഉംറ മന്ത്രാലയവും ‘ദൈവത്തിന്റെ അതിഥികൾ’ പദ്ധതിയും ചേർന്നാണ് ഇത് നടത്തുന്നത്.
കഴിഞ്ഞ വർഷത്തെ കോൺഫറൻസ് വലിയ വിജയമായിരുന്നു. 1,20,000-ലധികം സന്ദർശകരും 137 രാജ്യങ്ങളിൽ നിന്നുള്ള 220-ലധികം പ്രദർശകരും അതിൽ പങ്കെടുത്തു. 670-ലധികം സഹകരണ കരാറുകളാണ് കഴിഞ്ഞ വർഷം ഒപ്പുവെച്ചത്. ഈ വർഷത്തെ കോൺഫറൻസിൽ 2,400-ൽ അധികം ആളുകൾ പങ്കെടുക്കും. 80-ൽ അധികം സെഷനുകളും 60 പ്രത്യേക വർക്ക്ഷോപ്പുകളും ഇതിന്റെ ഭാഗമായി നടക്കും.
ഹജ്ജിന്റെയും വിശുദ്ധ ഹറമുകളുടെയും ചരിത്രം പരിചയപ്പെടുത്തുന്നതിനായി കിങ് അബ്ദുൽ അസീസ് ഫൗണ്ടേഷൻ ഒരു പ്രത്യേക സാംസ്കാരിക ഫോറം സംഘടിപ്പിക്കും. ഡിജിറ്റൽ സാങ്കേതികവിദ്യയുടെ സഹായത്തോടെയാണ് ചരിത്രപരമായ വിവരങ്ങൾ ഇവിടെ അവതരിപ്പിക്കുക. 52,000 ചതുരശ്ര മീറ്ററിൽ നടക്കുന്ന പ്രദർശനത്തിൽ 260-ൽ അധികം പ്രദർശകർ ഉണ്ടാകും. ഭാവിയിലെ ഹജ്ജ് സേവനങ്ങൾക്കുള്ള നൂതനമായ ആശയങ്ങൾ അവതരിപ്പിക്കാൻ 15 സ്റ്റാർട്ടപ്പുകളും സംരംഭകരും ‘ഇന്നൊവേഷൻ സോൺ’ എന്ന വിഭാഗത്തിൽ മാറ്റുരയ്ക്കും.
സാങ്കേതികവിദ്യകളും അനുഭവങ്ങളും കൈമാറുന്നതിനുള്ള ഒരു ആഗോള വേദിയായി കോൺഫറൻസ് പ്രവർത്തിക്കുമെന്ന് മന്ത്രാലയം അറിയിച്ചു. സൗദി വിഷൻ 2030-ന്റെ ഭാഗമായ ‘ദൈവത്തിന്റെ അതിഥികൾ’ പദ്ധതിയുടെ ലക്ഷ്യങ്ങൾ പൂർത്തീകരിക്കാനും ഇത് സഹായകമാകും. താൽപ്പര്യമുള്ളവർക്ക് www.hajjconfex.com എന്ന വെബ്സൈറ്റ് വഴി രജിസ്റ്റർ ചെയ്യാം.
