ജന നായകൻ ഓഡിയോ ലോഞ്ച് ക്വാലാലംപുരിൽ; വിജയ്‍യുടെ അവസാന ചിത്രം ജനുവരി 9-ന് തീയറ്ററുകളിലേക്ക്

നടൻ വിജയ്യുടെ കരിയറിലെ അവസാന ചിത്രമായ ‘ജന നായകൻ’ റിലീസിനായുള്ള കാത്തിരിപ്പിലാണ് ആരാധകർ. ഇപ്പോഴിതാ ചിത്രത്തിന്റെ ഓഡിയോ ലോഞ്ച് തീയതി നിർമാതാക്കളായ കെവിഎൻ പ്രൊഡക്ഷൻസ് ഔദ്യോഗികമായി പുറത്തുവിട്ടിരിക്കുകയാണ്. ഡിസംബർ 27-ന് മലേഷ്യയിലെ ക്വാലാലംപുരിലെ ബുകിറ്റ് ജലിൽ സ്റ്റേഡിയത്തിൽ വെച്ചാണ് വിപുലമായ ഓഡിയോ ലോഞ്ച് ചടങ്ങ് നടക്കുക. ലോകത്തിന്റെ വിവിധ ഭാഗങ്ങളിൽ നിന്നുള്ള വിജയ്യുടെ ആരാധകർ ഈ പരിപാടിയിൽ പങ്കെടുക്കുമെന്ന് പ്രതീക്ഷിക്കുന്നു.

പരിപാടി പ്രഖ്യാപിച്ചുകൊണ്ട് നിർമാതാക്കൾ കഴിഞ്ഞ ദിവസം ഒരു വീഡിയോ പുറത്തുവിട്ടിരുന്നു. വിജയ്യുടെ സിനിമാ ജീവിതത്തിലെ നിർണ്ണായക ചിത്രങ്ങളായ ഖുശി, ഗില്ലി, പോക്കിരി, വേട്ടൈക്കാരൻ, തുപ്പാക്കി, തെരി, മെർസൽ, ബിഗിൽ, മാസ്റ്റർ, ലിയോ എന്നീ ചിത്രങ്ങളിലെ രംഗങ്ങൾ ഈ വീഡിയോയിൽ ഉൾപ്പെടുത്തിയിട്ടുണ്ട്. കൂടാതെ, മലേഷ്യയിലെ ആരാധകർ തങ്ങൾക്ക് വിജയ് ആരായിരുന്നു എന്നതിനെക്കുറിച്ചുള്ള അനുഭവങ്ങളും, വിജയ് പൊതു പരിപാടികളിൽ സംസാരിച്ച വാക്കുകളും വീഡിയോയിൽ പങ്കുവെക്കുന്നുണ്ട്.

എച്ച്. വിനോദ് സംവിധാനം ചെയ്യുന്ന ഈ ചിത്രത്തിലെ ഒരു ഗാനം അടുത്തിടെ പുറത്തുവന്നിരുന്നു. വിജയ്യോടൊപ്പം പൂജ ഹെഗ്‌ഡെ, ബോബി ഡിയോൾ, മമിത ബൈജു, ഗൗതം വാസുദേവ് മേനോൻ, പ്രകാശ് രാജ്, നരെയ്ൻ, പ്രിയ മണി എന്നിവരും പ്രധാന വേഷങ്ങളിലെത്തുന്നുണ്ട്. അനിരുദ്ധാണ് ചിത്രത്തിന് സംഗീത സംവിധാനം നിർവഹിക്കുന്നത്. 2026 ജനുവരി 9-ന് ചിത്രം ലോകമെമ്പാടുമുള്ള തീയറ്ററുകളിൽ എത്തും. വെങ്കട്ട് കെ. നാരായണാണ് കെവിഎൻ പ്രൊഡക്ഷൻസിന്റെ ബാനറിൽ ‘ജന നായകൻ’ നിർമ്മിക്കുന്നത്. ജഗദീഷ് പളനിസ്വാമിയും ലോഹിത് എൻ. കെയും സഹനിർമ്മാതാക്കളാണ്.