സ്നേഹത്തോടെ ‘തൊട്ടോട്ടേ’ എന്ന് ലീലാമണിയമ്മ; ചേർത്തുപിടിച്ച് മോഹൻലാൽ, ഹൃദയം കവർന്ന് ചിത്രങ്ങൾ

തന്നെ കാണാനെത്തുന്ന ആരാധകരെ സ്നേഹത്തോടെ ചേർത്തുപിടിച്ച് പെരുമാറുന്ന മോഹൻലാലിന്റെ ചിത്രങ്ങൾ പലപ്പോഴും നമ്മൾ കണ്ടിട്ടുണ്ട്. തലമുറകളുടെ നായകനായി അദ്ദേഹത്തെ നിലനിർത്തുന്നത് ഈ സ്നേഹമാണെന്നാണ് ആരാധകരുടെ അഭിപ്രായം. ‘തുടരും’ എന്ന ചിത്രത്തിന്റെ ഷൂട്ടിംഗ് സമയത്ത് “ഇതാണോ മോഹൻലാൽ?” എന്ന് ചോദിച്ചു ലൊക്കേഷനിലെത്തിയ ഏലിക്കുട്ടി വല്യമ്മയുമായി മോഹൻലാൽ നടത്തിയ സംഭാഷണവും അടുത്ത കാലത്ത് ഏറെ ശ്രദ്ധ നേടിയിരുന്നു. ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്, ആത്മാർത്ഥമായ സ്നേഹം പ്രകടിപ്പിക്കുന്ന സാധാരണക്കാരോട് മോഹൻലാൽ കാണിക്കുന്ന കരുതലിന്റെ മറ്റൊരു ചിത്രമാണ്. ‘ദൃശ്യം 3’ യുടെ ലൊക്കേഷനിൽ അദ്ദേഹത്തെ കാണാനെത്തിയ എൺപതുകാരിയായ ഐമുറി മാടവന വീട്ടിൽ ലീലാമണിയമ്മയാണ് ഇത്തവണത്തെ താരം.

പെരുമ്പാവൂരിൽ ഷൂട്ടിംഗ് നടക്കുന്നതറിഞ്ഞാണ് ലീലാമണിയമ്മ പേരക്കുട്ടിയായ ശ്യാംകൃഷ്ണനൊപ്പം ലൊക്കേഷനിൽ എത്തിയത്. അൾത്താരയ്ക്കുള്ളിൽ ഷൂട്ടിംഗ് നടക്കുന്ന ഭാഗത്തേക്ക്‌ വലിയ തിരക്കായതിനാൽ ആരെയും കടത്തിവിടുന്നുണ്ടായിരുന്നില്ല. മറ്റുള്ളവർ ദൂരെ നിന്ന് ലാലിനെ കണ്ട് മടങ്ങിയെങ്കിലും ലീലാമണിയമ്മ കാത്തിരുന്നു. ലാലിനെ കണ്ടിട്ടേ മടങ്ങൂ എന്ന് സിനിമാപ്രവർത്തകരോട് പറഞ്ഞതിനെത്തുടർന്ന്, ഒടുവിൽ വൈകിട്ട് അഞ്ചുമണിയോടെ കാത്തിരുന്ന ആരാധികയുടെ അടുത്തേക്ക് മോഹൻലാൽ നേരിട്ടെത്തി. വീട്ടിലെ വിശേഷങ്ങൾ തിരക്കുന്നതിനിടെ, ആരാധിക “തൊട്ടോട്ടേ?” എന്ന് ചോദിച്ചപ്പോൾ അദ്ദേഹം നിറഞ്ഞ സ്നേഹത്തോടെ അവരെ ചേർത്തുപിടിച്ചു. അദ്ദേഹത്തെക്കുറിച്ച് എഴുതിയ ഒരു പാട്ട് പാടിക്കേൾപ്പിക്കാൻ ആഗ്രഹിച്ചിരുന്നെങ്കിലും സമയക്കുറവ് കാരണം സാധിച്ചില്ലെന്ന് ലീലാമണിയമ്മ പിന്നീട് പറയുകയുണ്ടായി. കടുത്ത മോഹൻലാൽ ആരാധികയായ ലീലാമണിയമ്മ ടിവിയിൽ വരുന്ന അദ്ദേഹത്തിന്റെ സിനിമകൾ ആവർത്തിച്ചു കാണാറുണ്ട്. ‘ആറാം തമ്പുരാൻ’ ആണ് തനിക്ക് ഏറ്റവും ഇഷ്ടപ്പെട്ട സിനിമയെന്നും അവർ കൂട്ടിച്ചേർത്തു.

അതേസമയം, മോഹൻലാൽ-ജിത്തു ജോസഫ് കൂട്ടുകെട്ടിൽ ഒരുങ്ങുന്ന ‘ദൃശ്യം 3’ യുടെ ചിത്രീകരണം തൊടുപുഴയിലും കൊച്ചിയിലുമായി പുരോഗമിക്കുകയാണ്. ജോർജുകുട്ടി എന്ന കഥാപാത്രത്തിന് നാല് വർഷത്തിന് ശേഷം വരുന്ന മാറ്റങ്ങളാണ് മൂന്നാം ഭാഗത്തിൽ പ്രധാനമായും അവതരിപ്പിക്കുന്നത് എന്ന് ജിത്തു ജോസഫ് നേരത്തെ വ്യക്തമാക്കിയിരുന്നു.